Nadia Vega hasoru Horta hodi promove kampaña turizmu
DILI, 06 Juñu 2025 (TATOLI)—Artista Indonézia, Nadia Vega, vizita Palásiu Prezidensiál no hasoru malu ho Prezidente Repúblika, José Ramos Horta, hodi hala’o entrevista badak ho Xefe Estatu, atu promove kampaña turizmu ida-ne’ebé ho objetivu atu introdús liután Dili ba públiku iha indonéziu.
Notísia Relevante: Rui Orlando, Anji Manji no Nadia Vega to’o iha TL
Nia reprezenta mídia Indonézia nian no hakarak hametin ligasaun entre Indonézia no Timor-Leste, hodi destaka fahe sira-nia istória ba malu no enkoraja atu aumenta liután setór turizmu nian.
Ramata entrevista ho Prezidente Repúblika, Nadia Vega diretamete vizita mós salaun ASEAN iha Palásiu Prezidensiál.
Halo reportajen espesiál (SILET) iha Programa Televizaun SCTV nian. nia Kontente haree Timor-Leste nią preparasaun ba ASEAN no fó bem-vindu ba Timor-Leste hodi sai Membru Permanente iha fulan-Outubru 2025 ne’ebé mai.
Iha dadalia ho ekipa mídia Prezidénsia Repúbllika, Nadia hateten, nia kontente mai Timor-Leste no fó kontribuisaun ba festivál Tasi Fest.
“Ha’u hakarak kontribui no promove kampaña turizmu kruzadu ida entre Timor-Leste no Indonézia, foka introdús Dili ba turista Indonézia sira enkuantu hatudu mós atrasaun Indonézia nian ba sira-ne’ebé iha Dili,” Nadia Vega hateten liuhusi nota ne’ebé Tatoli asesu husi míia Palsiu Prezidensiál, ohin.
DJ Nadia Vega ne’ebé mak famozu iha Indonézia, hamutuk ho Artista sira seluk mai iha Timor-Leste hodi atua iha TasiFest 2025 iha Dili, entre loron 05 to’o 07 fulan-Juñu ne’e, hodi fó kontribuisaun ba promosaun kultura, edukasaun ambientál no kolaborasaun internasionál, liuhusi performansa musikál no projetu sosiál ne’ebé fó impaktu pozitivu ba komunidade.
Nia subliña katak, Timor-Leste no Indonézia iha ligasaun istóriku ne’ebé metin, tanba ne’e nia espresa minia interese iha atividade sira hanesan ne’e hodi atrai vizitante Indonézia barak liután, liuliu bele mai haree biodiversidade oioin ne’ebé úniku no furak iha Tasi okos illa Timor nian.
TATOLI
