DILI, 11 Juñu 2025 (TATOLI)—Koordenadór Jerál ba Jogu Desportivu Komunidade País Lian Portugés (CPLP, sigla portugés) no atuál Sekretáriu Estadu Arte no Kultura, Jorge Soares Cristovão konvoka reuniaun ho pontu fokál liña ministeriál ne’ebé sai mós hanesan membru Komisaun Organizadora, hodi transmite progresu preparasaun eventu molok submete proposta ba Konsellu Ministru.
“Ita atu transmite koordenasaun hotu husi Governu liuhusi Ministériu Juventude Desportu Arte no Kultura ninia progresu ba preparasaun durante ne’e nomós progresu koordenasaun ho partisipante hotu ne’ebé sei mai partisipa iha eventu jogu CPLP,” Koordenadór Jerál relata ba jornalista sira, iha salaun enkontru Ministériu Juventude, Desportu, Arte no Kultura (MJDAK), iha Bidau-Lesidere, Kuarta ne’e.
Timor-Leste sei sai uma-na’in ba Jogu Desportivu CPLP, ne’ebé sei realiza iha 17 to’o 27 Jullu tinan ne’e.
Notísia relevante : MJDAK- BNCTL asina akordu fó apoiu ba jogu CPLP
MJDAK rejista ona partisipante husi nasaun ualu inklui Timor-Leste, enkuantu Brazíl seidauk iha konfirmasaun.
“Prezide hanesan uma-na’in, ita hotu iha responsabilidade atu halo preparasaun ne’ebé di’ak hodi simu delegasaun sira hotu,” nia fó hanoin.
Aleinde ne’e, Komisaun Organizadora sei halo aprezentasaun rezultadu preparasaun ba Jogu Deaportivu CPLP ba Konsellu Ministru hodi halo apresiasaun.
“Tanba ne’e iha enkontru ida-ne’e rasik sei partilla mós programa balun ne’ebé define ona ba Jogu Desportivu ne’e. Husu mós ba pontu fokál husi kada liña ministeriál sira atu submete dokumetu ba Komisaun Organizadora nune’e bele prodús ona kartaun asesu ba eventu ne’e rasik,” Sekretáriu Estadu katak.
Jornalista : Alexandra da Costa
Editora : Julia Chatarina
