DILI, 16 Juñu 2025 (TATOLI)—Governu Japaun liuhusi Embaixadór Japaun iha Timor-Leste, Tetsuya Kimura, segunda ne’e, hasoru malu ho Prezidente Repúblika, José Ramos Horta, hodi hato’o Japaun nia felisitasaun ba Timor-Leste nia adezaun ba membru plenu ASEAN iha fulan-Outubru mai ne’e, iha Palásiu Prezidensiál Nicolau Lobato, Bairru Pite, Dili.
Notísia Relevante: PN hahú prepara-aan ba TL nia adezaun sai membru plenu ASEAN
“Iha enkontru ho Prezidente Repúblika, Japaun kongratula Timor-Leste kona-ba desizaun ASEAN nian hodi admite Timor-Leste sai nu’udár membru plenu ASEAN,” Embaixadór ne’e hateten ba jornalista sira hafoin ramata enkontru ho Xefe Estadu.
Durante enkontru, nai dehan, Embaixadór Kimura atualiza mós ba Xefe Estadu kona-ba projetu kooperasaun sira ne’ebé daudaun ne’e la’o hela no hetan apoiu másimu husi Japaun.
“Projetu kooperasaun sira-ne’ebé ha’u atualiza ba Prezidente Repúblika mak iha área infraestrutura relasaun ho projetu Aeroportu nian no projetu ida tan iha Ospitál Nasionál Guidu Valadares. Ida tan mak projetu diversifikasaun industria. Ida-ne’e ami foin mak hahú projetu peska kosteira nian, liuhusi espesialista Japaun nian ne’ebé mak mai hela iha Timor-Leste hodi ajuda kona-ba téknika moderna nian,” nia dehan.
Iha enkontru ne’e, parte rua ko’alia mós kona-ba dezenvolvimentu rurál liuliu kona-ba edukasaun no saúde ne’ebé antes ne’e Japaun apoiu hela Timor-Leste.
“Ita mós ko’alia kona-ba bolsa estudu sira-ne’ebé durante ne’e Japaun fó ba Timor-Leste. Ita ko’alia mós kona-ba ami-nia apoiu ba Timor-Leste nia adezaun ba ASEAN. JICA agora daudaun ne’e halo hela tradusaun ba dokumentu husi ASEAN nian, husi Portugés mai fali lian seluk, ajuda mós envia stuff timoroan ba iha Sekretariadu ASEAN kona-ba kurtu prazu no logu prazu,” nia hateten.
Nia relata, daudaun ne’e Japaun mós halo hela investimentu privadu balun iha Timor-Leste hanesan iha Manatutu kona-ba planta painel solár.
Jornalista : Hortencios Sanchez
Editór : Cancio Ximenes
