DILI, 23 Juñu 2025 (TATOLI)—Autoridade Munisípiu Dili (AMD) sei koordena ho Governu hodi halo manutensaun ba iluminasaun (lampu) no toilet sira-ne’ebé a’at iha jardín sira iha Dili laran.
Prezidente Autoridade interinu Munisípiu Dili, António Agosto Guterres hateten, jardín sira iha Dili laran balun Ministériu Turizmu no Ambiente nia kompeténsia no balun entrega mai Autoridade Munisípiu Dili, hanesan jardín Galery Farol, jardín 05 de Maiu, jardín Maloa no jardín Palásiu Governu nia oin.
“Ita halo hela identifikasaun ba lampu sira-ne’ebé a’at no iha balun mak ita troka tanba keima lalais. Aleinde ne’e, lampu sira-ne’e mós ita tenke identifika hodi hato’o ba Autoridade Munisípiu Dili hodi troka lampu sira-ne’ebé keima no sirkuítu ba fiu kotu, hafoin hadi’a,” Prezidente Autoridade interinu informa ba Ajénsia TATOLI, via telefónika, Segunda ne’e.
Notísia relevante : Empreza Seroka sei kuda ai-funan iha jardin sira iha kapitál Dili
Daudaun AMD serbisu hamutuk ho Uniaun Sidade Kapitál Língua Portugeza (UCCLA, sigla portugés), ne’ebé oferese iluminasaun ruma hodi tau ba jardín iha Palásiu Governu nia oin.
“Liuliu iha tasi-ibun tanba kalan ne’e nakukun, entaun ita presiza tau lampu atu fó naroman ba movimentu sirkulasaun bá-mai. Lampu iha jardín Palásiu Governu oin ne’e daudaun ne’e iha hela prosesu levantamentu dadus, nomós Ministru Administrasaun Estatál aseita no aprova ona, hein halo de’it instalasaun. Totál lampu ne’ebé sei troka hamutuk neen modelu solár sel (kalan lakan, loron mate),” nia akresenta.
Nia dehan, AMD sei haree jardín sira seluk no halo koordenasaun ho Governu sentrál hodi halo manutensaun ba iluminasaun sira-ne’ebé keima no toilet a’at.
“Ekipa jestaun husi autoridade munisípiu mak halo limpeza, maibé kona-ba manutensaun ne’e mak ita presiza haree lai tanba presiza kustu, entaun agora ita prevee osan iha Governu sentrál no sei halo pedidu depois submete fali para oinsá bele hadi’a toilet no lampu sira,” Prezidente Autoridade interinu, katak.
Jornalista : Alexandra da Costa
Editora : Julia Chatarina
