Utilizasaun estrada públika ba atividade privada presiza hetan autorizasaun
DILI, 23 Juñu 2025 (TATOLI)—Prezidente Autoridade interinu Munisípiu Dili, António Agosto Guterres, hateten, kualker sidadaun no entidade sira-ne’ebé hakarak uza estrada públika ne’e presiza hetan autorizasaun hodi legaliza sira-nia atribuisaun hodi bele uza.
“Pedidu ne’ebé komunidade submete hodi hetan autorizasaun ba utilizasaun estrada públika ne’e depende, balun 24 oras, iha 48 oras no 72 oras, maibé laiha autorizasaun ba uza semana ida,” Prezidente Autoridade interinu informa Ajénsia TATOLI, via telefónika, Segunda ne’e.
Nia dehan, karik iha komunidade balun mak kontra regra ne’ebé estabelese ona maka guarda munisipál sei halo identifikasaun direta iha terrenu hodi halo atuasaun.
Kondisaun ne’e hatuur ona iha dekretu-lei nú. 33/2008 ne’ebé ko’alia kona-ba ijiene no orden públiku.
Notísia relevante : Orsamentu kontrata karreta tanke rega ai-horis iha Estrada públiku iha faze kompromisu
Autoridade Munisipál interinu ne’e katak, bainhira entidade ida iha bairru laran atu halo festa ka família ruma mate no okupa espasu públiku hodi loke tenda ne’e presiza hetan autorizasaun husi Autoridade Munisípiu Dili (AMD).
“La’ós uza estrada nonok de’it tanba lei mak hateten katak, bainhira uza estrada públika ba asuntu privadu tenke hetan autorizasaun husi autoridade munisipál sira,” nia reforsa.
Biban ne’e nia apelu, sidadaun sira presiza hetan autorizasaun bainhira hakarak uza estrada públika ka taka dalan asesu ba estrada públika ba seremónia balun ho durasaun 24 oras ka liu ida-ne’e.
“Entaun buat sira-ne’e hotu tenke iha autorizasaun la’ós iha sira-nia uma ona ne’ebé hakarak taka dalan konforme sira-nia hakarak,” António Agosto, tenik.
Jornalista : Alexandra da Costa
Editora : Julia Chatarina
