g7+ hala’o diskusaun meza redonda ho FPCD iha Mónaku
DILI, 25 Juñu 2025 (TATOLI)–Sekretáriu Jerál organizasaun intergovernamentál g7+, Helder da Costa, hateten g7+ hala’o reuniaun meza redonda (meza kabuar) ho Foundation for Post Conflict Development (FPCD) iha Mónaku, tanba iha tinan rua (2) kotuk organizasaun rua ne’e selebra ona akordu kooperasaun iha Lisboa Portugál.
Notísia Relevante: Horta konfirma simu kna’ar Enviadu Espesiál g7+ ba mediasaun konflitu mundiál
“Ita iha enkontru meza redonda ida entre FPCD ho g7+ tanba tinan rua (2) ba kotuk iha Lisboa Portugál ita asina ona akordu kooperasaun entre organizasaun rua ne’e. Entaun, enkontru ne’e atu halo revizaun ida kona-ba saida mak ita alkansa ona no saida mak ita tenke halo ba oin,” Helder hateten liu husi Voice Reoard ne’ebé Agência TATOLI asesu husi mídia Palásiu Prezidensiál, ohin.
Iha reuniaun ne’e, FPDC aprezenta pontu importante ida kona-ba atu públika livru ida-ne’ebé hatudu ai-han husi nasaun membru g7+ sira.
“Iha enkontru ne’e, sira mós aprezenta pontu oan ida kona-ba atu públika livru ida kona-ba ai-han husi nasaun g7+ sira-nian. Iha autór ida mak hakerek kona-ba buat ne’e no sira sei kompleta projetu ne’e iha fulan-Dezembru,” nia dehan.
Iha ámbitu ne’e, g7+ no FPDC mós identifika área importante ne’ebé parte rua bele servisu hamutuk.
“Iha g7+ ami hatete katak imi tenke rona aspirasaun husi nasaun membru sira-ne’e, saida mak sira hakarak alkansa, promosaun ba pás, promosaun dezenvolvimentu emprezariál liuliu investimentu iha rai-laran. Oinsá mak FPDC bele halo imi-nia lobi ho entidade sira hotu iha Europa,” nia dehan.
Iha okaziaun ne’e, Prezidente Repúblika José Ramos Horta fó mós orientasaun ba g7+ atu mantein kooperasaun metin ho FPDC tanba organizasaun referidu nia fundadór mak Liurai Mónaku, Alberto II.
“Prezidente fó ona orientasaun mai ami atu mantein kooperasaun metin ho FPDC tanba organizasaun ne’e nia fundadór mak Liurai Alberto II. Nia lider ida-ne’ebé influensia maka’as iha nasaun Europa. Nia mós ema ida-ne’ebé kampiaun kona-ba konservasaun marítima, konservasaun rekursu naturál ho ekonomia azu. Buat sira-ne’e hotu no nia ema ida-ne’ebé fó duni atensaun ba situasaun sira-ne’ebé nasaun g7+ sira enfrenta,” nia dehan.
Jornalista : Hortencio Sanchez
Editór : Cancio Ximenes
