DILI, 25 Juñu 2025 (TATOLI)-Diretór Jerál Servisu Koorporativu iha Ministériu Solidariedade Sosiál no Inkluzaun (MSSI), Fernando dos Reis, informa kompañia Toyota mak manán konkursu sosa ambulánsia haat no karreta operasionál haat.
“Ami sosa veíkulu no kompañia Toyata mak manán, agora asina ona akordu no hein de’it fornesimentu hosi kompañia”, nia dehan ba TATOLI iha MSSI, ohin.
Planu kompra veíkulu ne’e atu hatán ba difikuldade transporte iha nasionál. “Ba manán ne’e ita tau osan hamutuk rihun $500, no kada karreta sei kona rihun $45 no iha balun ne’ebé liu tanba ita sosa de’it mak karreta no sei modifika fali ambunlánsia tanba ne’e la hanesan”.
Governu aprova $26,188.602 iha proposta Orsamentu Jerál Estadu (OJE) 2025 hodi kontinua fó prioridade programa serbisu no atendimentu sosiál ba povu.
“OJE 2025 ami-nian $26.188.602 hodi aloka ba saláriu vensimentu $3,982,088, beins no serbisu $10,744,951, transferénsia públika $9,501,672, kapitál menór rihun $500 no kapitál dezenvolvimentu $1,459,891. Ami iha programa prioridade rua mak ida (1) dezenvolvimentu instituisionál no rua (2) serbisu no atendimentu sosiál”, hatete Ministra Solidariedade Sosiál no Inkluzaun (MSSI), Verónica das Dores.
Notísia relevante: MSSI sei sosa tan karreta funeráriu lima
Jornalista : Osória Marques
Editora : Rita Almeida
