OEKUSI, 28 Juñu (TATOLI) – Sekretária Rejionál Edukasaun no Asuntu Sosiál (SREAS) Rejiaun Administrativa Espesiál Oekusi Ambeno (RAEOA) submete ona lista funsionáriu na’in-32 ba Komisaun Funsaun Públika (KFP) tanba idade tama ona ba reforma obrigatóriu.
Diretór Rekursu Umanu iha Sekretária Rejionál Edukasaun no Asuntu Sosiál, Sebastião Icu, informa funsionáriu na’in-32 ne’e, na’in-lima nu’udar rejime jerál iha edukasaun no na’in-27 rejime espesiál nu’udar profesór.
Notísia relevante:Reforma obrigatóriu hanesan dalan ida prepara foin-sa’e sira
“Ita-nia funsionáriu na’in-32 tama ona ba idade 60-resin atu reforma, dadus ne’e ami foin hatama iha Komisaun Funsaun Públika, maibé ita akompaña nia prosesu la’o ne’ebé sei akontese iha 2026, tanba sei haree mós sira-nia direitu atu reforma ne’e,” Sebastião Icu, ba jornalista ira iha Oekusi, ohin.
Profesór na’in-27 ativa iha prosesu aprendizajén, maibé balun kondisaun saúde la permite atu kontinua hanorin, tanba idade besik tama ona 70.
Profesór na’in-27 ne’e mai husi ensinu sekundária, pré-sekundáriu no naʼin-rua kontratu indeterminadu, no la’os edukasaun mak obriga maibé sira rasik mak rekerre ka submete pedidu mai Diresaun Edukasaun Rejionál, hodi husu atu deskansa ona nu’udar profesór.
“Agora, ami hein de’it desizaun husi Komisaun Funsaun Públika tanba pedidu atu reforma ne’e edukasaun hato’o ona, ne’ebé agora ita hein desizaun husi Komisaun Funsaun Públika,” nia hateten.
Iha fatin hanesan, Profesór Daniel da Conçeição, ho idade 67 kontinua hala’o kna’ar nu’udar profesór lingua portugúeza, iha Eskola Sekundáriu Jerál Palaban, rekomenda ba Governu tenke kria ona kondisaun, nune’e bele fó oportunidade ba foinsa’e sira.
“Ha’u hanoin Governu tenke trata asuntu ne’e ho sériu, tanba ami sira-ne’e katuas ona, ha’u-nia idade 67 ona, tenke iha direitu atu deskansa ona, nune’e ita bele fó oportunidade ba foinsa’e sira, ita labele okupa fatin ne’e to’o mate, labele rai ne’e ita hotu nian, presiza fó fatin ba maluk sira seluk, ami sira uluk loloos deskansa ona, tanba ami-nia kondisaun saé mós ladun di’ak ona,” nia rekomenda.
Notísia relevante:Komisaun A aprova paréser proposta-lei reforma obrigatóriu ba funsionáriu públiku
Entretantu, totál profesór ne’ebé ativu hela iha prosesu aprendizajén hamutuk 896, komposta husi profesór permanente na’in-415, ingresu espesiál na’in-280, kontratu indeterminadu na’in-61, bolsu kandidatu na’in-80 no profesór kontratu kazuais na’in-60.
Jornalista: Abílio Elo Nini
Editór: Florencio Miranda Ximenes
