BOBONARU, 01 Jullu 2025 (TATOLI)—Sarani sira husi suku Oe-leu, postu administrativu Bobonaru, munisípiu Bobonaru, tersa ne’e, ho entuziasmu simu illas krús joven ne’ebé entrega husi sarani suku Tapo.
Notisia Relevante: KNJK-TL forma ekipa sinodal ba preparasaun vizita krús joven internasionál
Prezensa ilas krús joven ne’e simu direta husi xefe suku Oe-leu, Januario Meta-Tae Bragança, no lia-na’in sira ho serimónia kulturál hanesan dadolin, bidu, likurai hodi fó bem-vindu ba krús santu ne’ebé sei hela iha suku ne’e durante semana rua nia-laran.
Xefe Suku Oe-leu, Januario Meta-Tae Bragança, sente orgullu no fiar katak krús santu ne’e sei lori pás no unidade ba sarani no foinsa’e sira iha suku ne’e.
“Ninia vizita mai iha ne’e, komunidade ka juventude ne’e hahalok ladi’ak durante ne’e, ida-idak halo reflesaun hodi soe hahalok aat sira-ne’ebé uluk halo, atu nune’e fó dame ba suku ida-ne’e. Nune’e, ita hotu hanoin de’it ba dezenvolvimentu rai ida-ne’e nian,” nia informa ba jornalista Tatoli, iha aldeia Mologuen.
Aleinde ne’e, sarani suku Oe-leu, Juvania Bragança, sente orgulku tanba mehi kle’ur atu hetan vizita krús santu ne’e, ohin sai ona realidade.
Durante vizita semana rua nia laran, Juvania dehan, sira sei halo devosaun atu husu tulun, bensaun no grasa hodi kasu sala ne’ebé joven no familia ida-idak durante ne’e.
“Ha’u sente kontente tanba foin primeiravés krús joven mai vizita ami-nia suku. Ha’u fiar katak ami-nia sala, pekadu ne’ebé durante ne’e ami sente krús joven bele perdua nomós lori dame no domin mai ami joven suku Oe-leu no ami-nia postu administrativu Bobonaru, munisípiu Bobonaru,” nia dehan.
Biban ne’e, Pároku Igreja María Imaculada da Conseição, postu administrativu Bobonaru, Pe. Ernesto Barreto, hateten krús santu ne’e nu’udár simbólu unidade, tanba amu-kulik ne’e husu ba sarani sira atu lori vizita hale’u kada uma kain atu hodi bele hetan grasa matak malirin ba familia ida-idak.
“Krús joven ne’e ba halibur família sira hirus malu, oho malu, vinga malu, nahe biti boot monu-aan, husu deskulpa ba malu ne’e mak objetivu husi vizita krús ne’e ninia vizita,” nia dehan.
Enkuantu durante fulan sia (9) nia-laran krús santu ne’e vizita Haleu ona suku 16 no tuir oráriu sai husi suku Oe-leu sei vizita suku Malilait no ramata iha suku Bobonaru hafoin entrega ba Parokia Remexiu-Aileu loron 29 fulan-Agostu tinan 2025.
Notisia Relevante : Pe. Ernesto husu sarani postu Bobonaro prepara aan simu Krús Joven
Jornalista : Sergio da Cruz
Editór : Cancio Ximenes
