DILI, 02 Jullu 2025 (TATOLI)-Diretór Ezekutivu Ajénsia Nasionál Avaliasaun Akreditasaun Akadémika, Institutu Públika (ANAAA,I.P), Nilton Diamantino Paiva Mau, informa ANAAA akredita tán ona kursu 10 ho instituisaun ida.
Kursu 10 mak hanesan Universidade Nasionál Timor Lorosa’e (UNTL) iha departamentu komérsiu turizmu, edukasaun, biolojia, matemátika, fízika, inglés. Iha Institutu Politékniku Betanu (IPB) mak kursu konstrusaun sivíl ho produsaun animál. Universidade Orientál Timor Lorosa’e (UNITAL) mak kursu jestaun ho inglés no mai fali iha Institutu Siénsia Saúde (ICS, sigla portugés) mak akreditasaun institusionál ba segundu siklu.
Nia realsa tuir planu ANAAA nia hosi fulan ne’e to’o Outobru kursu 10 ho instituisaun ida tan. Kursu 10 ne’e sei maihusi Universidade da Paz (UNPAZ), mak kursu agrikultura nian, Instituto Superior de Filosofia e de Teologia, D. Jaime Garcia Goulart nian mak kursu filozofia, seluk ne’e iha Dili Institute of Tehcnology (DIT) no Institutu Universidade Naroman Esperansa (IUNE) Ermera.
“Ita fó akreditasaun ba institusionál UNE ne’e tanba ita-nia ekipa ANAAA halo avaliasaun desde tinan kotuk to’o tinan ne’e, ne’ebé UNE sei hetan akreditasaun ba primeiru siklu iha tinan ne’e”, nia dehan.
Nia informa, iha tinan 2024 ANAAA halo akreditasaun ba 19 kursu, no instituisaun neen.
“Instituisaun neen ne’ebé ANAAA halo akreditasaun iha 2024 mak UCT ne’e ba primeiru síklu, institutu Ensinu Superiór Don Bosco Komoro ne’e ba segundu síklu, ISFIT mós ba segundu síklu, ba ETCI (East Timor Coffee Institute) Glenu ne’e terseiru síklu, UNDIL ba terseiru síklu no UNITAL ba terseiru síklu. Kursu 19 ne’e kompostu husi kursu sira husi UNITAL, IOB, UNPAZ, UNTL no ETCI”, nia informa.
Orsamentu Jerál Estadu (OJE) ba ANAA tinan-ne’e hamutuk rihun $801, ne’ebé ANAAA aloka ba programa rua. “Programa rua mak hanesan, akreditasaun, kooperasaun, peskiza no preparasaun treinamentu ba pesoál sira ne’ebé liga direita ho ANAAA hanesan xefe departamentu, no dekanu sira, orsamentu ne’e mós inklui ho alokasaun edifisiu ANAAA. Osan ba tinan ida-ne’e sufisiente ba ANAAA.
Notísia relevante: MESSK husu Prezidente ANAAA foun avalia kursu iha IES ho rigór
Jornalista : Osória Marques
Editora : Rita Almeida
