DILI, 02 Jullu 2025 (TATOLI)–Xefe Departamentu Asaun Sosiál Eskolár no Merenda Eskolár, Belchior Guerra, hateten produtu lokál ne’ebé sei menus ninia efeitu ba implementasaun programa merenda eskolár ba eskola sira iha territóriu.
“Konsellu Nasionál ba Soberania, Seguransa Alimentár no Nutrisaun iha Timor-Leste nu’udar sumbriña ida buka mekanismu oinsá atu hasa’e produsaun lokál hodi distribui ba merenda eskolar”, nia dehan ba TATOLI iha nia knaar fatin Vila Verde, kuarta ne’e.
Tuir manuál no dekretu-lei númeru 71 ba merenda eskolár ne’e hateten pursentu 75 husi orsamentu ne’e tenke ba produtu lokál, katak orsamentu ne’ebé fó bele kontribui ba hodi hola produtu lokál sira-ne’ebé mak iha munisípiu ida-idak.
“Ita hatene katak programa merenda eskolár ne’e polítika governu nian atu entrega osan ba eskola sira atu hasa’e kualidade merenda eskolár. Objetivu entrega osan ne’e atu sosa produtu lokál sira, la’ós eskola mak lakohi sosa maibé produtu menus”, nia dehan.
Nia dehan tan: “Monitorizasaun ne’ebé mak ami halo husi modo tahan de’it iha pursentu 92, ne’e siknifika modo tahan mak barak, naan fresku sira ne’e pursentu 58, manu tolun ne’e maioria hola husi Railaku no Loes nian ne’ebé ita iha pursentu 68, kona-ba ikan dalaruma pursentu kiik tanba ikan karun no balu susar atu hetan ida fresku”.
Nia hatutan ba fehuk-europa, tomate, fore sira ne’e pursentu 75 husi produtu lokál ne’e mós depende ba iha ninia produsaun iha ida-idak ninia munisípiu.
“Ita hatene katak modo-tahan ne’e barak liu, maibé ne’e depende ba fali iha ida-idak nia munisípiu, la’ós eskola mak lakohi hola produtu lokál, maibé dalaruma mós nesesidade ita-nia produsaun iha rai-laran kiik liu hanesan koto, tempe, fehuk-europa inklui ai-fuan”, dehan nia.
Alende ne’e mós bee-hemu nian mós hanesan, sira sosa galon mak fó, maibé ai-han kímika sira ne’ebé hanesan sosis, ayam potong sira ne’e laiha.
Totál eskola ne’ebé asesu ba merenda eskolár hamutuk 1.531, ne’e inklui ho ensinu báziku no pre-eskolár sira, eskola katólika no privadu.
Notísia relevante: ME sei hapara EJP ba merenda eskolár iha territóriu nasionál
Jornalista : Osória Marques
Editora : Rita Almeida
