DILI, 04 Jullu 2025 (TATOLI)—Inspetora Autoridade Inspesaun Fiskalizasaun Atividade Ekonómika Sanitária no Alimentár (AIFAESA), Odete Viegas, informa AIFAESA taka provizóriu Dapur Timor iha Metiaut tanba la ijene.
“Ami-nia ekipa taka Dapur Timor iha Metiaut ne’eba, tanba sira nia kondisaun la ijene hanesan produtu espiradu no estragadu, ventilasaun sira, iha buat lubuk ida mak iha. Ha’u labele mensiona hotu maibé ita-boot sira hatene katak iha kritériu 13 kedas, entaun ida-ne’e mak sai hanesan pontu ba ami atu taka provizóriu,” Odete Viegas hateten bainhira enkontru ho asosiasaun Nasionál Joven Emprezariu Timor-oan kona-ba enseramentu Dapur Timor no impkatu sira ba dezenvolvimentu setor privadu, iha edifisiu AIFAESA, Matadoru, ohin.
Ttaka provizóriu ne’e sei to’o fulan ida, maibé empreza sira bele hadi’a sasán dentru semana ida ka semana rua bele loke fila-fali, depende ba sira-nia vontade atu hadi’a.
“Se sira mak hakarak prolonga to’o fulan ida-ne’e deprnde sira, maibé ita nafatin fó sansaun ba sira tanbaa kada sansaun iha nia koima ketak. Agora, kriteiru ne’e to’o 13, ida-ne’e buat lubuk ida. Dalaruma hanesan timoroan ita mós lakohi maibé situasaun sira hanesan ne’e, ita presiza hadi’a, maske ita sakrifika an uitoan, maibé ba oin sempre iha dalan ne’ebé mak di’ak-liu,” nia relata.
Nia husu ba emprezáriu sira labele foti kestaun ne’e, maibé ida-ne’e hanesan lisaun ba ema hotu no ba oin bele hadia di’ak liután.
Prezidente Asosiasaun Nasionál Joven Emprezáriu Timor-Leste, Juvinal Morais, hato’o agradesementu ba servisu AIFAESA nian la’o di’ak durante akonpaña iha mídia sosiál katak, sira-nia sevisu la’ós foin primeiravés taka restaurante sira, maibe taka restaurante barak ona no fó rekomendasaun katak Dapur Timor presiza hadi’a ijene sira.
“Ohin, ami mai hasoru ho AIFAESA atu tuur hamutuk ho sira kona-ba taka provizóriu Dapur Timor ne’e. Ami rekoñese katak buat balun falla maibé ami husu ba sira karik bele labele publika imajen iha mídia sosiál, tanba nia impkatu boot ba konsumidór sira-ne’ebé mak iha,” Prezidente informa.
Iha loron 30 fulan-Juñu, ekipa operasionál AIFAESA taka provizóriu atividade negósiu restaurante Dapur Timor ne’ebé lokaliza iha Metiaut.
Desizaun suspende provizóriu ne’e tanba restaurante refere nia kondisaun la ijiene, nune’e AIFAESA rekomenda atu bele hadi’a kondisaun tuir kriteria ne’ebé iha.
Jornalista : Felicidade Ximenes
Editór : Cancio Ximenes
