DILI, 08 Jullu 2025 (TATOLI)–Ministériu Solidariedade Sosiál no Inkluzaun (MSSI) hamutuk ho perseiru dezenvolvimentu sira lansa ona Buletin Estatístika dahuluk kona-ba protesaun sosiál, ne’ebé liga ba asuntu sósial liuliu vulneravel sira iha Timor-Leste.
“Primeiravéz MSSI halo lansamentu ba livru estatístika asuntu sósial ba grupu vulneravel sira. Buletin ida-ne’e liga ba sósiu-ekonómiku, protesaun sosiál ba labarik, protesaun sosiál ba idozu no protesaun sosiál ba grupu vulneravel,” Ministra Solidariedade Sosiál no Inkluzaun, Verónica das Dores, ba joralista sira, iha salaun MSSI, Kaikoli, tersa ne’e.
Nia dehan apoiu ne’e maihusi parseiru sira hanesan sosiedade sivíl no organizasaun internasionál hamutuk buka dadus hodi elabora sai hanesan matadalan ida nune’e ohin bele lansa ba públiku.
“Dadus ida-ne’e la maihusi nasaun seluk maibé husi estatístika nasionál Ministériu Finansa,” Verónica haktuir.
Nia esplika katak dadus idozu no bolsa da mãe hira mak MSSI apoiu ona ne’e kompletu ona iha livru ne’e nia laran.
Notísia relevante: Timor-Leste hetan apoia husi Pakistaun estabelese sistema protesaun sosiál
Governante ne’e hatutan Timor-Leste hanesan nasaun ezemplár iha mundu tanba ne’e tenke iha rasik lei ba Fundu Rezerva Seguransa Sosiál, Fundu Idozu no Bolsa da Mãe.
“Timor nasaun ida-ne’ebé ezemplár tebes tanba ami vizita ona nasaun barak maibé ita-nian ne’e úniku. Ida mak kria Fundu Rezerva Seguransa Sosiál no mós fundu sira seluk mensionadu. Governu atuál prioriza asuntu ida-ne’e,” nia subliña.
Iha sorin seluk, Diretór Jerál MSSI, Florêncio Pina liuhusi nia deskursu hateten asuntu sosiál ne’e ema hotu iha direitu atu asesu iha situasaun vulnerabilidade nia laran.
“Buletin ida-ne’e esforsu husi ami-nia ekipa téknika no dirijente sira hodi halibur sistemátika no analiza dadus estatístika hodi harii sistema protesaun sosiál ida-ne’ebé universál, inkluzivu, reziliente no bazeia ba dadus ne’ebé konfiavel,” nia konklui.
Jornalista : Osória Marques
Editora : Julia Chatarina
