Autoridade lokál prefere ME konstrui rezidénsia ba manorin iha arreadór eskola
DILI, 09 Jullu 2025 (TATOLI)–Xefe Suku Fatuhada, Postu Administrativu Dom Aleixo, Munisípiu Dili, Marcelino Soares prefere Ministériu Edukasaun (ME) konstrui rezidénsia ba monorin iha arreadór eskola sira iha territóriu nasionál.
“Ohin okupante sira hamamuk ona eskola ne’e. Ne’ebé, ha’u sujere ba ME atu tau-matan ba profesór sira. Sira tenke iha rezidénsia rasik (kazerna) maibé tenke iha arreadór eskola ka resintu eskola nian, tanba okupante sira-ne’e balun profesór ne’ebé hanorin iha-ne’e,” nia dehan bainhira akompaña prosesu muda okupante sira iha arredór Eskola Sekundária 10 Dezembru, Komoro, Kuarta ne’e.
Autoridade lokál ne’e esplika katak objetivu harii rezidénsia iha arreadór eskola atu profesór sira bele la’o besik bá hanorin no labele lakon tempu, tanba bainhira hela dook ne’e ameasa ba sira-nia vida no gasta tempu.
Notísia relevante : Okupante sira hahú hamamuk resintu Eskola ESJ 10 Dezembru
Iha fatin seluk, Diretór Edukasaun Munisípiu Dili, Sabino Soares hateten atu halo konstrusaun rezidénsia ba manorin sira, seidauk tama iha planu.
“Ha’u hanoin iha Dili laiha razaun katak uma laiha. Sira uma iha maibé ita Timor nia karater mak dalaruma hakarak aproveita buat balun,” nia tenik.
Diretór ne’e esplika katak tenke identifika sé loos mak merese atu hela iha ne’ebá (kazerna) tanba karater Timor ne’e nia mai dehan mesak, maibé la kle’ur lori família mai tan,” nia hakotu.
Jornalista : Osória Marques
Editora : Julia Chatarina
