DILI, 09 Jullu 2025 (TATOLI)—Prezidente Federasaun Futeból Timor-Leste (FFTL), Nilton Telmo Gusmão, hateten ninia orientasaun klaru ba diresaun hotu iha FFTL tenke kumpre hotu rekezitu husi Federation International Football Assosiation (FIFA) no labele haree ba orsamentu iha ka laiha.
Notísia Relevante: Nilton Gusmão: Timor-Leste labele dependente de’it ba fundu husi FIFA
“Rekezitu hotu husi FIFA ita tenke kumpre. Ha’u-nia orientasaun klaru, ba jogu internasionál sira hotu ita tenke foti, labele haree ba orsamentu atu iha ka laiha. Organizasaun ida FFTL ne’e nia fonte orsamentu mai husi FIFA no Asian Football Confederation (AFC) no Asian Football Federation (AFF), maibé orsamentu sira depende tebes ba alkansu sira-ne’ebé ita halo tinan kotuk nian,” Nilton Telmo Gusmão hateten ba Agência Tatoli liuhusi programa “Entrevista Eskluziva” ho topiku “Dezafiu no progresu Dezenvolvimentu Fuetból iha Timor-Leste”, iha estúdiu Faról, tersa (08 Jullu 2025) ne’e.
Nia dehan, kritéria ne’ebé FIFA fó ba FFTL kada tinan hamutuk 11 ne’e tenke kumpri atu nune’e bele hetan finanseiru ida-ne’ebé másimu.
“Maibé kuandu ami hahú tama iha FFTL, FIFA hateten mai ami katak tinan liuba ita kumpre de’it kriteria haat (4). Tanba de’it ita kumpri kriteria haat (4), ita simu ita-nia direitu ladun másimu. Ida-ne’e signifika difikulta uitoan ita-nia situasaun federasaun nian. Maibé, ho ema hotu ne’ebé ha’u konvida mai servisu hamutuk ho ha’u, ami hotu-hotu komprometidu katak ita labele haree ho fundu hanesan ne’e, ita limita ita nia atividade. Lae, ita buka atu partisipa atividade hotu hodi responde ba kritéria sira,” Nilton dehan.
Tanba ne’e, hahú husi Janeiru-Jullu 2025 ne’e, FFTL kumpre ona kriteria liu ona haat (4) husi FIFA no kriteria seluk sei kumpre tan iha fulan sira ba oin, atu nune’e tinan ne’e ramata bele kumpre kriteria 11 id- ne’e la ramata maibé tenke to’o kriteria sia (9) hanesan ne’e.
“Agora, ita kumpre ona kritéria liu ona haat (4) no husi kritéria 11 ne’e, fiar katak antes tinan ne’e ramata, ita tenke kumpre kritéria sira-ne’e to’o sia (9) hanesan ne’e,” nia hateten.
Kriteria sira-ne’ebé FIFA fó mak hanesan, tenke partisipa jogu internasionál sira feto no mane, hala’o jogu rai-laran, halo jogu amigavel entre Timor-Leste ho nasaun seluk, tenke sai uma-na’in ba jogu internasionál sira no atividade futeból seluk tan.
Jornalista : Hortencio Sanchez
Editór : Cancio Ximenes
