Nilton Gusmão: Timor-Leste labele dependente de’it ba fundu husi FIFA
DILI, 09 Jullu 2025 (TATOLI)–Prezidente Federasaun Futeból Timor-Leste (FFTL) Nilton Telmo Gusmão, hateten Timor-Leste la dependente de’it ba fundu ne’ebé mai husi Federation International Football Assosiation (FIFA) no Asian Football Confederation (AFC), maibé tenke halo ezersisiu husi fonte seluk hodi sustenta atividade hotu hodi dezenvolve futeból iha nasaun ne’e.
Notísia Relevante: Nilton Gusmão: “Ha’u promete sei fó tempu dezenvolve futeból TL”
“Esforsu hotu ita halo, ita hetan fundu mai husi FIFA no AFC, maibé ita labele foku de’it ba iha fundu ne’ebé ita simu husi organizasaun inan, maibé ita tenke halo ezersisiu extra ruma atu bele responde ba programa sira hotu,” Nilton Telmo Gusmão hateten ba Agência Tatoli liuhusi programa “Entrevista Eskluziva” ho topiku “Dezafiu no progresu Dezenvolvimentu Fuetból iha Timor-Leste”, iha estúdiu Faról, tersa (08 Jullu 2025) ne’e.
Nia dehan, bainhira jogu internasionál sira Timor-Leste mak sai nu’udár uma-nai’in bele poupa osan barak no bele lori mós osan barak husi li’ur mai rai-laran.
“Realidade ida ohin lae, ita labele halo jogu iha rai-laran entaun ita tenke aluga kampu ida iha rai-li’ur atu ita bele joga hanesan uma na’in. Uluk, sira sempre aluga kampu iha Indonézia, maibé agora ita aluga iha Darwin-Australia. Primeiru, tanba besik liu, no segundu tanba ita iha komunidade timoroan barak iha ne’ebá. Kuandu jogu, sira mós bele mai fó apoiu, ida ne’e ami deside tanba futeból ita labele iha de’it ema na’in-11 ne’ebé joga iha kampu laran ne’e, maibé presiza ema iha kampu li’ur atu fó apoiu,” nia relata.
Nia hatutan, ho preparasaun hotu FFTL tenke gasta orsamentu ne’ebé boot maibé orsamentu sira ne’e la’ós de’it mai husi FIFA maibé estrutura FFTL halo esforsu extra hodi hetan fundu atu apoiu ba atividade hotu.
“Ami iha FFTL tanba iha duni paixaun, la’ós ha’u de’it, ha’u-nia Sekretariu Jerál, ha’u-nia diretór sira ami servisu hamutuk atu fó apoiu tanba paixaun ba futeból,” nia dehan.
Durante ne’e, FFTL hetan fundu mai husi FIFA no AFC maibé ho montante ne’ebé mínimu tanba iha tinan sira ba kotuk estrutura anteriór la konsege responde kriteria sira hotu husi FIFA.
“Ita kada tinan hetan apoiu husi AFC rihun $500, husi FIFA depende ba kriteriu 11 ne’ebé ita halo. Primeiru, kriteria ho segundu kriteriu kada kriteriu ida rihun $150. Rua, hamutuk rihun $300 restu ne’e iha rihun $50. Se tinan kotuk ita halo haat ita hamutuk entre rihun $600-resin mak ita hetan husi FIFA,” nia hateten.
Notísia Relevante: Konstrui Estádiu iha Tasi-Tolu sei la destroi fatin istóriku
Jornalista : Hortencio Sanchez
Editór : Cancio Ximenes
