MSSI no BCTL estabelese akordu kona-ba Fundu Rezerva Seguransa Sosiál
DILI, 15 Jullu 2025 (TATOLI)–Ministériu Solidariedade Sosiál no Inkluzaun (MSSI) estabelese akordu ho Banco Central de Timor-Leste (BCTL) hodi depózita Fundu Rezerva Seguransa Sosiál (FRSS).
Ministra Solidariedade Sosiál no Inkluzaun, Verónica das Dores hateten estabelesimentu memorandu ida-ne’e ho nia objetivu atu jere fundu seguransa sosiál ho valór kapitál hamutuk millaun $50.
“Bazeia ba relatóriu husi Institutu Nasionál Seguransa Sosiál (INSS) no Fundu Rezerva Seguransa Sosiál, akordu ida-ne’e parte ida atu halo diversifikasaun ba FRSS ho sustentabilidade liuhusi merkadu finanseira iha rai-laran no rai-li’ur,” nia dehan iha nia kna’ar fatin, Tersa ne’e.
Ministra haktuir katak husi inísiu kriasaun Lei Fundu Rezerva Seguransa Sosiál iha tinan 2017 to’o mai 2023, nia orsamentu FRSS hamutuk $151.402. 538, 60 no iha 2024 to’o 2025 nia orsamentu $110.980.262,28, ho nia 42,2%.
Notísia relevante : FRSS komunika ho entidade finanseiru atu aplika investimentu iha nivel esteriór
Nia dehan, antes ne’e mós depózita ona fundu referidu iha banku komersiál sira iha Timor-Leste hanesan BNCTL, Mandiri, BNU, BRI, ANZ no agora akordu tan ho BCTL.
“Ita-nia FRSS ne’e la’ós rai de’it iha ita-nia banku maibé rai mós iha banku estranjeiru hanesan Caixa Gestão de Ativo Portugál no sei iha negosiasaun atu rai mós iha International Consultion Investiment Malázia,” Verónica informa.
Iha sori seluk, Prezidente BCTL, Helder Lopez hateten Fundu Rezerva Seguransa Sosiál ne’ebé sei depózita iha BCTL ho montante $50.000.000.
“Orsamentu ne’e sei investe iha rai-li’ur tuir akordu no tuir títulu tezouru Amérika. Ho akordu ida-ne’e BCTL sei lori ninia esperiénsia jere ita-nia fundu minarai hodi halo jestaun di’ak ba FRSS ne’ebé husi MSSI no INSS,” nia tenik.
Jornalista : Osória Marques
Editora : Julia Chatarina
