Prezidente Autoridade RAEOA inaugura sentru resepsaun iha Pante Makasar

OEKUSI, 16 Jullu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), kuarta ne’e, inaugura konstrusaun foun edifísiu sentru resepsaun traballu, ne’ebé konstrui iha bairru Kiumaria iha suku Costa sub-rejiaun Pante Makasar.

“Obra ne’e importante, tanba liuhusi uma-mahon, mak ita sei fó mahon ba ema sira-ne’ebé sai vítima iha violasaun oioin; violasaun seksuál no violasaun doméstika, tanba ita-nia sosiedade la perfeitu, sempre iha problema, entaun fasilidade ne’e, bele sai sentru mahon ba ema sira-ne’ebe sofre violasaun,” nia ko’alia iha ámbitu inaugurasaun ne’e.

Tanba ne’e, autoridade másima RAEOA ne’e apela ba sidadaun hotu atu kontribui tau matan ba fasilidade foun ne’e, nune’e labele hetan estragu no markasaun iha parede sira, tanba obra referida konstrui ho osan Estadu, tenki fó benfisíu ba ema hotu.

“Ita-nia karatér Timór ne’e, kuandu parede foun hanesan ne’e, baibain joven sira mak marka oioin, ho kór metan, kinur no seluktan. Ha’u husu respeita ita-nia obra sira-ne’ebé Governu harii ona, tanba buat sira-ne’e ita-nian rasik, la’ós ema seluk nian, hakarak ita-nia rai ne’e furak, ita na’in mak tenke kuidadu sasán sira-ne’e. Ne’ebé, ha’u husu labele halo fo’er, husik to’o tinan 10-resin mak ita bele halo tan reabilitasaun mós di’ak,” nia fó hanoin.

Sekretária Rejionál Edukasaun no Asuntu Sosiál, Inácia Tamele, agradese ba sosiedade sívil sira-ne’ebé durante ne’e halo advokasia Governu, atu kria uma sentru resepsaun ka uma-mahon, bele trata maluk sira-ne’ebé presiza tulun.

“Uma ne’e sei servisu barakliu parseria entidade relevante barak, tanba uma ne’e foin dahuluk Governu harii iha Oekusi. Tan ne’e, agradese, tanba obra ne’e harii iha mandatu Governu anteriór tanba konsidera fasilidade ne’e importante ba ema hotu,” nia hateten.

Notísia relevante: https://tatoli.tl/2023/12/12/governu-apoia-orsamentu-ba-vitima-uma-mahon-haat-la-sufisiente/

Entretantu, konstrusaun edifísiu sentru resepsaun traballu ne’e, konstrui hosi empreza lokál Dinhola Unipesoál Lda, ho valór kontratu hamutuk $343,486.97, hodi konstru kompletu ho komplexu, fatin ba seguransa, instalsaun bee-moos, no projetu ne’e hahú ezekuta iha tinan-2023 ho durasaun servisu tinan ida.

Jornalista: Abílio Elo Nini

Editór: Rafael Ximenes de A. Belo