CTA garante Timor-Leste preparadu realiza jogu desportivu CPLP
DILI, 17 Jullu 2025 (TATOLI)–Komité Tékniku Monitorizasaun (CTA, sigla portugés) Jogu Desportu Komunidade Nasaun Sira Ko’alia Lian Portugés (CPLP-sigla portugés) garante ona katak, Timor-Leste preparadu atu sai uma-na’in ba edisaun ba da-12 jogu desportivu CPLP ne’ebé ne’ebé sei realiza iha semana ne’e.
Notísia Relevante: Delegasaun Portugál to’o ona iha Timor-Leste
Deklarasaun ne’e hato’o hosi Koordenadór Jerál, Jorge Carvalho, akompañadu husi Prezidente CTA-CPLP, António da Luz, iha marjen enkontru xefe misaun sira-nian iha Sentru Konvensaun Dili (CCD, sigla portugés).
Iha konferénsia imprensa, Jorge Carvalho esplika katak enkontru ne’e hakarak koordena aspetu lojístiku no jogu desportivu hotu-hotu molok hahú kompetisaun sira.
“Objetivu prinsipál husi enkontru ne’e maka garante preparasaun ne’ebé efisiente, tantu organizasionál no atletikamente, atu nune’e atleta sira hotu bele alkansa sira-nia dezempeñu di’ak-liu no fornese espetákulu ida ho kualidade ba públiku,” nia hateten.
Responsável ne’e mós indika katak desportu oioin ne’e sei namkari iha fatin oioin mak iha Estádiu Munisipál sei sai uma-na’in ba atletizmu no futeból, jináziu Díli nian sei sai uma-na’in ba karate, taekwondo, no basketebol 3×3, enkuantu voleiból praia iha tasi-ibun sei hala’o iha Lecidere no xadrez sei hala’o iha CCD.
Jorge Carvalho elojia GovernuTimor-Leste nia esforsu hodi hadi’a instalasaun desportu sira atu bele realiza jogu desportivu CPLP ba da-12 iha Timor-Leste.
“Iha ona melloria signifikativu sira ba Estádiu Munisipál, pista atletizmu nian, jináziu sira, no kampu basketeból nian. Kondisaun sira iha ona atu ami bele iha jogu sira-ne’ebé di’ak,” nia garante.
Responsável ne’e mós subliña katak desportu tenke sai hanesan motor ba dezenvolvimentu ekonómiku no turizmu.
“Halo uma-na’in ba jogu sira-ne’e sei hasa’e komérsiu lokál, setór otelaria no transporte. Aleinde ne’e, planeia ona konferénsia sira kona-ba étika iha desportu, doping no juventude, ne’ebé sei iha impaktu pozitivu ba Timor-Leste no ba rejiaun,” nia hateten.
Bainhira husu kona-ba auzénsia husi Brazil no Guiné Equatoriál, Jorge Carvalho klarifika katak Brazíl nia razaun hodi la partisipa tanba kestaun sira preparasaun internu nian hafoin eleisaun sira.
Guiné Equatoriál, iha parte seluk, hasoru nafatin difikuldade sira tanba sei iha hela faze dezenvolvimentu desportivu no seidauk partisipa iha edisaun sira ikus ne’e.
Antonio da Luz hatutan, sentimentu ida-ne’e hodi destaka nivel di’ak husi akomodasaun otél nian ba delegasaun sira. Maibé, nia admite katak aldeia desportiva ida atu promove interasaun boot-liu entre atleta sira sei sai dezejável.
Atu garante koordenasaun efetivu durante jogu sira, enkontru diáriu ida husi xefe misaun sira marka ona entre tuku 07h00 no tuku 08h00 dadeer, hodi rezolve kestaun ruma ho fatin sira kompetisaun nian no akomodasaun sira.
Jornalista : Hortencio Sanchez
Editór : Cancio Ximenes
