VIKEKE, 18 Jullu 2025 (TATOLI)—Xefe Suku Makadiki de Baixo, Rogério da Silva hateten Konsellu Suku Makadiki de Baixo sei implementa Konsellu Polisiamentu Komunitáriu (KPK) hodi kombate krime sira-ne’ebé akontese iha suku.
Xefe Suku Makadiki de Baixo, Rogério da Silva haktuir Polísia Nasionál liuhusi Polisiamentu Komunitária Munisípiu Vikeke ne’ebé oferese ona formasaun ba membru KPK na’in-42 iha Suku Makadiki de Baixo, bá-oin sei implementa iha suku hodi kombate krime sira.
“Ohin ami simu ona pose nu’udár membru KPK iha Suku Makadiki de Baixo hodi hala’o kna’ar no kompeténsia sira-ne’ebé ami aprende ona. Bá-oin ami prontu hodi implementa atu kombate krime sira-me’ebé akontese iha ami-nia suku foun ida-ne’e,” Rogério da Silva ba TATOLI iha Suku Makadiki de Baixo, Sesta ne’e.
Notísia relevante: PNTL Vikeke pose KPK iha Suku Makadiki atu apoia seguransa
Xefe KPK ne’e dehan membru KPK sei prepara mós planu asaun sira hodi minimiza problema sira-ne’ebé akontese iha Suku Makadiki de Baixo no sei esforsu di’ak liután atu krime labele akontese.
Iha fatin hanesan, Veteranu Uatulari, Afonso da Silva ‘Kalik’ informa katak PNTL forma ona KPK iha Suku Makadiki de Baixo ida-ne’e hodi haforsa PNTL iha suku tanba daudaun ne’e PNTL Vikeke menus rekursu umanu, tan ne’e difisil kontrola suku sira.
“Ha’u sente forma KPK ne’e haforsa ona ita-nia polísia sira atu asegura ita-nia estabilidade iha suku ida-ne’e. Ha’u husu KPK sira nafatin kolabora ho ita-nia PNTL sira iha Eskuadra Uatulari, nune’e akontese buat ruma informa lalais ba sira hodi evita problema,” nia hateten.
Iha biban ne’e, Reprezentante Komandante PNTL Munisípiu Vikeke atuál Komandante Operasionál, Asistente Superintendente Polísia, José Afonso hateten estabelesimentu KPK ne’e sai importante ba komunidade iha Suku Makadiki de Baixo hodi halo prevensaun ba konflitu sira-e’ebé sempre akontese iha komunidade nia leet.
Iha serimónia pose ba membru KPK, partisipa husi Autoridade Lokál, Komandante Eskuadra PNTL Uatulari no komunidade.
Jornalista: Vitorino Lopez da Costa
Editór: Xisto Freitas da Piedade
