DILI, 22 Jullu 2025 (TATOLI) – Ekipa voleiból praia maskulina husi Kabuverde hakat ba semifinál depoizde halakon nia adversáriu husi Saun Tomé no Prínsipe ho set 2-0.
Ekipa rua ne’e esforsu an atu hadau malu pontu hodi hakat ba semifinál, maibé Kabuverde mak iha liu forsa hodi manán set dahuluk ho pontu 21 no Saun Tomé 12.
Hodi hakat ba set daruak nian, atleta husi Saun Tomé koko tátika oioin hasoru Kabuverde hodi hetan pontu, maibé jogadadór kabuverdianu sira kontinua aumenta sira-nia esforsu no ikus mai manán set daruak 21-9.
Iha kompetisaun ne’e, Kabuverde reprezenta husi Denzer Ramos (1) no Marcel Barbosa (2) no Saun Tomé husi Osmar (1) no Mauro (2).
Atleta kabuverdianu, Denzer Ramos, hateten rezultadu ohin ne’e halo sira satifás tebes, tanba sira-nia esperansa nu’udar reprezentante nasaun hakarak mak manán iha jogu ne’e.
Notísia relevante: Voleiból femeninu: Timor-Leste hakat ba semifinál
Jornalista: Arminda Fonseca
Editora: Maria Auxiliadora
