Ekipa basketeból Angola sai kampiaun iha jogu desportivu CPLP
DILI, 25 Jullu 2025 (TATOLI)-Ekipa basketeból mane no feto husi Angola sai kampiaun hafoin ekipa mane halakon adversáriu Kabuverde ho pontu 17-14. Enkuantu ekipa feto Angola sai primeiru lugar tanba manán ekipa basketbal feto Portugál ho pontu 12.
Jogu ekipa mane atrai tebes adeptusira nia matan tanba ida-ida ho nia tátika. Minutu dahuluk, Angola hatudu uluk nia pontu, maibé Kabuverde mos la nonok hodi hakotu pontu 12-12 ba intervalu.
Tama parte daruak, ekipa rua ne’e hakas-an hodi la hatudu sira-nia pontu fraku. Angola soe husi dook hodi aumenta pontu sa’e ba 14, Kabuverde mos duni ho pontu 13.
Minutu ikus, Kabuverde la konsege aumenta pontu tanba Angola xavi kedas pontu ba 16 hodi sai kampiaun iha jogu referidu.
Enkuantu terseiru lugár hela ho ekipa Portugál hafoin halakon uma na’in ho 21-3.
Entretantu ba ekipa feto segundu lugár okupa husi Mosambike no terseiru lugár okupa husi Portugál no Timor -Leste sai kuatru lugár.
Kapitaun ekipa basketbal feto Timor- Leste, Maria Auxiladora Ximenes, hateten sira lakon no la hetan medalla ruma iha jogu ne’e, maibé promete jogu sira sei hadi’a liután tan fiziku no mentál tanba durante jogu fatór ne’ebé halo sira lakon mak fiziku no mentál.
“Ami triste tanba ami seidauk konsege oferese medalla iha modalidade ba basketeból ne’e, ami-nia forsa mak to’o ne’e de’it . Ami husu deskulpa ba Timor tomak katak ami labele manán jogu ida-ne’e, maibé jogu tuir mai, ami sei hadi’a-an hori manán”, nia afirma.
Iha fatin hanesan, jogadór Angola, Alexadro Nune’e Gomes, hateten kontente tanba bele manán.
“Jogu ida-ne’e orgullu ida ba ami tanba nu’udar manán na’in maibé mós jogu ida ne’e hametin liutan ami-nia relasaun hanesan nasaun CPLP”, nia hateten.
Nia dehan, kontente mai iha Timor-Leste tanba bele koñese Timor -Leste.
Treinadora basketbal feto, Ana Lemos hateten, sente kontente haree ekipa basketeból Angola sai kampiaun iha jogu desportivu CPLP 2025.
Nia espresa durante realizasaun jogu desportivu CPLP la’o di’ak tebes no kontente haree Timor -Leste organiza ho susesu.
“Jogu sempre iha ida manán no lakon maibé importante husi jogu ne’e mak ba oin nafatin hametin relasaun Timor-Leste ho Angola”, nia afirma.
Nia dehan durante iha Timor, haree Timor-Leste nu’udar nasaun ne’ebé ho kultura rasik no atendimentu ne’ebé di’ak.
Prezidente Federasaun Basketeból Timor-Leste, Joaquim Gusmão, hateten agradese ba Governu ne’ebé organiza jogu desportivu CPLP.
“Rezultadu ne’ebé mak iha ita haree katak ita hotu asiste Angola mak sai hanesan primeiru lugár ba jogu ne’e tantu feto, tantu mane”, nia haktuir.
Nia dehan jogu three on three (tolu kontra tolu) ba oin hadia nafatin ita-nia atleta sira ho sira-nia altura ho sira ninian skill.
“Ita sei lakon husi sira ne’ebé mak mai husi akademia, ba oin ita sei halo di’ak liu tan ida ne’e”, nia afirma.
Tuir Joaquim, eventu ne’e nu’udar esperiénsia boot, tanba primeiravez.
“Ita laiha sertifikadu própriu ba basketeból nian no ita laiha própriu treinadór ba ekipa basketeból, ba oin ita sei haree ida-ne’e no hadi’a”, nia konklui.
Notísia relevante: Ekipa basketeból TL avansa ba finál maske derota dala-haat
Jornalista : Natalino Costa
Editora : Rita Almeida
