DILI, 30 Jullu 2025 (TATOLI)—Governu liuhusi reuniaun Konsellu Ministru (LM), kuarta ne’e, aprova projetu Dekretu-Lei ne’ebé kria Banku Nasionál Dezenvolvimentu Timor-Leste, SA (BNDTL), ne’ebé aprezenta husi Gabinete Ministru Planeamentu no Planeamentu Estratéjiku, Ministra Finansa no Vise-Primeiru Ministru no Ministru Koordenadór Asuntu Ekonómiku.
Notísia Relevante: Governu sei harii banku dezenvolvimentu fó kréditu ba empreza kiik sira
Ministru Prezidénsia Konsellu Ministru, Agio Pereira, hateten ohin mós desizaun boot ida kle’ur ona mak Governu iha hanoin atu harii banku nasionál dezenvolvimentu, ne’e la’ós banku komersiál maibé nia karáter ba dezenvolvimentu nasionál Timor-Leste ninian.
“Ida-ne’e atu apoiu setór privadu, produtivu no finansiamentu ba mediu no longu prazu hodi viabiliza situasaun ne’ebe difikulta dezenvolvimentu nasionál,” Ministru ne’e informa ba jornalista sira hafoin remata reuniaun Konsellu Ministru iha Palasiu Governu.
Tuir informasaun ne’ebe Agência Tatoli asesu liuhusi dokumentu ofisiál portál Governu katak, Banku Nasional Dezezenvolvimentu Timor-Leste (BNDTL) hanesan instituisaun finanseira ida ho kapital públiku ne’ebé eskluzivu ho personalidade jurídika no autonomia administrativa, finanseira no patrimoniál, ne’ebé nia objetivu atu apoia investimentu produtivu no hasa’e kreximentu ekonómiku sustentavel país nian.
Tuir diploma ne’ebé daudaun ne’e aprova, BNDTL iha misaun atu kompleta falla merkadu nian iha asesu ba finansiamentu médiu no tempu naruk, promove solusaun adekuada ba nesesidade komunidade emprezariál timoroan liuliu iha setór ne’ebé konsidera estratéjiku, hanesan agrikultura, indústria transformadora, turizmu, infraesruturas no servisu sosiál sira.
Banku ne’e bele mós hala’o funsaun iha jestaun fundu estratéjiku, tuir mandatu Governu nian, nune’e asegura ninia sustentabilidade iha futuru no neutralidade orsamentál.
Enkuantu diploma ne’e estabelese mós katak kapitál sosiál inisiál ne’ebé fiksa iha millaun $30, ne’ebé Estadu maka subskreve tomak.
Notísia Relevante: Hadi’a ekonomia, Governu planeia harii Banku Dezenvolvimentu hodi fó kréditu ba ema hotu
Jornalista : Alexandra da Costa
Editor : Cancio Ximenes
