DILI, 30 Jullu 2025 (TATOLI)–Ministériu Edukasaun (ME) sei fasilita estudante sira ne’ebé foin daudaun tuir eventu Jogu Desportivu Komunidade País ho Lian Portugés (CPLP, sigla portugés) ba dala-XII, atu tuir ezame ba segundu nian.
Sekretáriu Estadu Ensinu Sekundáriu Jerál no Ensinu Tekniku Vokasionál, Domingos Lopes Lemos, hateten ministériu nafatin fó oportunidade ba estudante sira atu iha ezame segunda via ou bele halo aula adisionál hodi reforsa sira, atu nune’e sira labele lakon sira-nia aprendizajen.
“Tanba ida-ne’e la’ós motivu pesoál, maibé ida-ne’e kooperasaun ho Ministériu Edukasaun, klaru que sira sei tuir ezame,” Sekretáriu Estadu informa ba jornalista sira, iha resintu ME, Vila-Verde, Kuarta ne’e.
Notísia relevante : Voleiból Praia : ekipa mista Timor-Leste hakat bá semifinál
Nia dehan, estudante sira ne’e ramata ona sira-nia atividade no sira sei filafali bá eskola para tuir ezame.
“Kona-ba estudante na’in hira nia labele ko’alia to’o iha ne’ebá tanba ida-ne’e refere ba Ministériu Juventude, Desportu, Arte no Kultura nian, maibé sei konfirma took lai eskola sira iha hira. Ha’u hanoin atividade sira ne’ebé mak reprezenta Timor iha CPLP, tanba ne’e husu ba Diretór Eskola sira atu fasilita prosesu ezame períodika ba estudante sira ne’ebé mak durante ne’e partisipa hela jogu CPLP,” Governnate ne’e katak.
Jogadór timoroan ne’ebé partisipa iha jogu CPLP mesak estudante ne’ebé ho idade 17 mai kraik.
Jornalista : Osória Marques
Editora : Julia Chatarina
