DILI, 31 Jullu 2025 (TATOLI)–Sekretáriu Estadu Komunikasaun Sosial, Expedito Dias Ximenes, realiza simpóziu hodi kria kurríkulu foun ba Diresaun Nasionál Formasaun Téknika Komunikasaun (DNFTC) ne’ebé tutela ba iha SEKOMS.
Sekretáriu Estadu Komunikasaun Sosial, Expedito Loro Dias Ximenes, hateten oportunidade atu halibur iha simpoziu importante tebes ida-ne’e, atu diskute kona-ba futuru ofisiál mídia nia kna’ar iha mundu komunikasaun ne’ebé kompleksu no iha era dijitál ne’e.
“Tanba ofisiál mídia nia kna’ar ohin loron la’ós ona hanesan transportadór informasaun de’it. Sira maka guarda sira narrativa, arkitetu komunikasaun públika nian no mós filtru informasaun ho konteúdu sira-ne’ebé dalaruma la kontroladu,” Sekretáriu Estadu hateten ba jornalista sira iha salaun MTK, Kaikoli, ohin.
Nia dehan, ita haree iha era dijitál ohin loron nian, iha ne’ebé informasaun suli lalais tebes dalaruma velosidade klarifikasaun nian atraza, ofisiál mídia nian tenke hamriik iha oin nu’udar ligasaun entre instituisaun sira ho órgaun komunikasaun sosiál sira (mídia).
Konsultan internasionál, Bayu Fiantoro, hateten objetivu husi simpóziu ne’e atu kria kurríkulu foun ba formasaun ofisiál mídia no profesionál komunikasaun iha Diresaun Nasionál Formasaun Téknika Komunikasaun, loloos ne’e la’ós buat foun maibé antes ne’e sira halo ona análize no avaliasaun hodi kria kurríkulu foun ne’e, nune’e ohin loron halo aprezentasaun hodi tau hanoin hamutuk iha simpóziu ne’e.
“Entaun kurríkulu ne’e ita halo sei haree bazeia ba kontestuál realidade ba Timor nian. Tanba ne’e, ita konvida partisipante sira husi intituisaun oioin, akademista sira hodi tau hanoin hamutuk, espera katak liuhusi ne’e bele iha hanoin komprensivu ba kurríkulu refere,” nia dehan.
Diretór Diresaun Nasionál Formasaun Téknika Komunikasaun, Julio Lopes, afirma liuhusi Governu da-sia ne’e iha diresaun lima ne’ebé tutela iha Sekretária Estadu Komunikasaun Sosiál, no iha diresaun ida mak hola parte iha kapasitasaun rekursu umanu liuliu iha setór públiku no setór privadu ne’ebé liga ho formasaun komunikasaun sosiál nian.
“Tanba liuhusi formasaun ne’e kuaze ita prodús ema lubun ida ona mak servisu hanesan ofisiál mídia iha instituisaun Estadu no mós iha setór privadu nian,” Diretór ne’e informa.
Nia hatutan, liuhusi diresaun ida-ne’e sira habelar mós formasaun iha nivél nasionál no mós iha munisipál, enkuantu iha nivél munisipál ho formasaun oin rua mak unidade formasaun protokolu no multimedia, tanba sira haree katak Governu sei tau programa dezentralizasaun poder lokál ba baze hodi ajuda kontribui.
“Nune’e, liuhusi simpóziu ne’e bele kria fali kurríkulu ne’ebé mak efikásia liután liuliu ajuda joven Timor sira-nia partisipasaun iha formasaun sira,” nia dehan.
DNFTC oras ne’e daudaun iha unidade formasaun hamutuk-ualu (8) mak hanesan unidade lian portugés, unidade multimedia, unidade komunikasaun relasaun públika, unidade hakerek imprensa, unidade rádiu, unidade televizaun, unidade lian tetun no unidade jestaun krize.
Tuir planu, Diresaun Nasionál Formasaun Téknika Komunikasaun sei kontinua habelar formasaun ba to’o iha nivél suku inklui aldeia iha territóriu nasionál.
Jornalista : Alexandra da Costa
Editor : Cancio Ximenes
