DILI, 04 Agostu 2025 (TATOLI)—Ministra asuntu Dezenvolvimentu Internasionál husi Austrália, Anne Aly MP, sei vizita Timor-Leste iha semana ida-ne’e nu’udar parte ida husi nia vizita ofisiál dahuluk mai iha Sudeste Aziátiku dezde asume kargu ba nia knaar foun hafoin Eleisaun Federál Austrália nian iha Maiu 2025 ne’e.
“Austrália mak parseiru dezenvolvimentu ida-ne’ebé konfiável no ami hakat ba oin iha tempu ida-ne’ebé iha inserteza globál– investe másimu iha asisténsia dezenvolvimentu no hatán ba prioridade lokál sira,” refere nota ne’ebé Agência Tatoli asesu husi mídia Embaixada Austrália iha Timor-Leste, ohin.
Iha nota ne’e hateten, Austrália nia programa dezenvolvimentu sira iha Sudeste Aziátiku avansa interese sira-ne’ebé fahe hamutuk ba rejiaun ida-ne’ebé seguru, estável no prósperu.
“Ami konsentradu ba dezafiu no oportunidade sira iha rejiaun ida-ne’ebé dinámiku liu iha mundu,” nota ne’e hateten.
Durante estadia iha Timor-Leste, Ministra Aly sei hasoru malu ho líder seniór sira husi Governu Timor-Leste nian hodi ko’alia kona-ba oinsá bele avansa prioridade dezenvolvimentu Timor-Leste nian, iha tempu hanesan Timor-Leste prepara daudaun atu adere ba ASEAN iha fulan-
Outubru ne’e.
Vizita referidu Hamutuk ho Enviadu Espesiál Austrália nian ba Sudeste Aziátiku, Nicholas Moore, no Kampeaun Negósiu Austrália nian ba Timor-Leste, Shane Walden, Ministra Aly sei tuir Konferénsia Ekonómika no Negósiu Timor-Leste-Austrália nian.
Konferénsia ne’e nu’udar oportunidade ida atu reafirma Austrália nia kompromisu atu halo parseria ho Timor-Leste atu atinji objetivu kreximentu ekonómiku no
diversifikasaun.
Jornalista : Hortencio Sanchez
Editór : Cancio Ximenes
