DILI, 05 Agostu 2025 (TATOLI)—Governu liuhusi Komité Revizaun Orsamentu (KRO), Tersa ne’e, hahú konvida instituisaun Estadu hodi halo analiza no revizaun ba proposta orsamentu adisionál ba Orsamentu Jerál Estadu (OJE) 2026 ne’ebé antes ne’e submete ona, bazeia ba tetu ne’ebé Ministériu Finansa (MF) distribui ona.
Nune’e, Ministériu Juventude Desportu Arte no Kultura (MJDAK) propoin tan orsamentu adisionál ba tinan 2026 hodi bele kobre programa no atividade sira.
“Ami simu pakote fiskál husi Ministériu Finansa hamutuk millaun $6-resin, maibé ami halo elaborasaun katak orsamentu ne’e la to’o atu kobre atividade sira hotu, liuliu iha área desportu no juventude, entaun ami propoin tan adisionál 100% husi millaun $6 ne’ebé ami simu, entaun ami rona Primeiru-Ministru nia hanoin no membru KRO sira-nia hanoin no laiha buat ida mak sai hanesan obstákulu, ami sei fó prioridade iha desportu,” Ministru Juventude Desportu Arte no Kultura, Nelyo Isaac Sarmento, informa ba jornalista sira, iha edifísiu Ministériu Finansa, Aitarak-laran.
MJDAK hala’o serbisu prioridade liu ba parte tolu hanesan desportu, juventude no arte kultura, maibé orsamentu ba tinan 2026 sei fó prioridade liu ba desportu.
“Orsamentu tinan oin nian, ami fó prioridade liu iha área desportu nomós hodi asegura iha funsionamentu institusionál, liuliu ba funsionáriu sira depois ami sei halo mudansa ba dadus funsionáriu sira husi permanente, ajente no kazuál sira. Loloos ami laiha buat ne’ebé foun atu aumenta, maibé pokote fiskál ne’ebé ami simu millaun $6 ne’e tun demais kuaze 40%, entaun ami-nia adisionál ne’e atu normaliza fali de’it,” Ministru tenik.
Notísia relevante : MJDAK prevee ona orsamentu halo manutensaun ba Estádiu tolu iha 2025
Iha sorin seluk, MJDAK ezekuta ona OJE 2025 ho persentajen 57% iha desportu no juventude, ne’ebé utiliza barak liu iha formasaun.
Seluk tan, maioria kompetisaun sei realiza iha trimestre datoluk ba leten, ne’ebé iha fulan-Agostu nia laran sei iha kompetisaun lubuk ida.
“Voleiból sei kontinua nia liga, ami mós sei haree hela oinsá atu realiza Festivál Desportu Nasionál. Ida-ne’e ami sei ko’alia ho Prezidente Autoridade Munisipál sira oinsá atu mobiliza atleta sira mai tuir kompetisaun no ami sei ko’alia mós ho federasaun desportiva sira,” nia katak.
MJDAK hetan alokasaun $9.472.726 iha tinan 2025, husi montante ne’e aloka ba saláriu no vensimentu hamutuk $2.729.571, bens no servisu $1.850.047,transferénsia públika $4.261.650, kapitál menór zero no kapitál dezenvolvimentu $631.458.
Orsamentu ne’ebé finansia ba kultura no patrimóniu hamutuk $833.172, funsionamentu no dezenvolvimentu institusionál $4.431.530 no inkluzaun sosiál $4.208.024.
Jornalista : Hortencio Sanchez
Editora : Julia Chatarina
