OEKUSI, 07 Agostu 2025 (TATOLI) – Asosiasaun Futeból Oekusi (AFO) realiza Kopa Juvenil ba feto no mane sub-17 atu halo selesaun nune’e ba futuru kompete iha nível rejionál ne’ebé sei realiza iha munisipíu Ermera no nível nasionál sei realiza iha munisípiu Dili.
Sekretáriu Jerál Asosiasaun Futeból Oekusi, Júlio Coel, informa katak, torneiu ne’e hala’o ho objetivu atu promove juventude foinsa’e sira – feto no mane, iha modalidade futeból no prepara jogadór sira ba futuru kontinua kompete iha nível rejionál no nasionál.
“Jogu ne’e kopa juvenil Federasaun Futeból Timor-Leste (FFTL) nian, maibé organiza husi asosiasaun munisipíu sira. Ita Oekusi jogu ne’e sub-17 ba feto no mane, ne’ebé moris iha 2008 to’o 2009 mai leten, mane iha grupu 16 no feto iha haat,” Júlio Coel ba Ajénsia TATOLI,I.P iha Oekusi, ohin.
Notísia relevante:26 agostu, AFO abertura turneiu futeból mane sub-16 no feto sub-35 iha RAEOA
Nia relata, orsamentu atu finánsia kopa ne’e, apoia husi Federasaun Futeból Timor-Leste hamutuk $2.700, hodi utiliza ba prémiu no alojamentu seluktan tanba kopa ne’e atu prepara fini ba futuru atu kompete nível rejionál no nasionál.
“Jogu juvenil ne’e remata, sei halo selesaun hodi kontinua ba kompete iha nível rejionál iha munisipíu Ermera ou Bobonaro, hafoin ne’e mak sei kontinua ba iha nível nasionál iha Dili,” nia informa.
Bainhira Assosiasaun Futeból Oekusi (AFO) eziste iha Oekusi iha 2019, hahú kedas organiza atividade kompetisaun futeból nível sekundáriu, realiza kopa referendu ba juventude sira, no iha outubru 2020 mak foin hahú realiza Kopa AFO ba sub-22 hanesan jogu rotativa.
Nia hateten, regulamentu iha torneiu ne’e, AFO utiliza regulamentu ne’ebé mak Federasaun Futeból Timor-Leste (FFTL) implementa ona iha nasaun Timor-Leste no mós kona-ba sansaun kartaun kinur, mean inklui dixiplina iha jogu laran.
Notísia relevante:Becune FC kampiaun Kopa AFO époka 2021, Oqui mellór markadór
Entretantu, torneiu ne’e, hetan apoiu másima seguransa husi PNTL-FDTL, ambulansia no Kruz Vermella Timor-Leste filiál Oekusi (CVTL) no kompetisaun ne’e realiza iha kampu futeból Oekusi.
Jornalista: Abílio Elo Nini
Editór: Rafael Ximenes de A. Belo
