OEKUSI, 12 Agostu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), tersa ne’e, hatuur fatuk-inan hodi reabilita projetu bee-moos unidade rua – ida mak bee-matan Oélnipsaun atu kanaliza ba komunidade uma-kain 120 iha aldeia Quibiselo suku Bobometo sub-rejiaun Oésilo, no bee-matan Oéleu atu kanaliza ba komunidade uma-kain 150 suku Bene-Ufe sub-rejiaun Nítibe.
Sekretáriu Rejionál ba Asuntu Administrasaun, Andre La’o, reprezenta Prezidente Autoridade RAEOA, hateten, projetu reabilitasaun unidade rua ne’e, manan liuhusi konkursu públiku, tanba nia baze orsamentu, Serbisu Água Saneamentu (SAS) prevee kedas iha Orsamentu Jerál Estadu (OJE) 2025 nian.
Tan ne’e, nia espera, kompañia konstrutora sira, aselera projetu referidu no garante kualidade, kumpre termu kontratu ne’ebé Autoridade propoin ona iha dokumentu termu kontratu.
“Ohin ita mai hamutuk ho komunidade no kompañia sira atu sai sasin, hodi entrega responsabilidade ba kompañia atu hahú serbisu, atu hadi’a bee, hodi kanaliza besikliu tan ba komunidade sira, tanba bee-moos importante ba ema, animál no ai-horis sira,” nia informa iha ámbitu lansamentu, ne’ebé hala’o iha aldeia Quibiselo Oésilo, ohin.
Nia fó hanoin ba komunidade sira katak, durante konstrusaun la’o, presiza koopera ho kompañia, liuliu afeta ba rai no plantasaun, “kompañia sei kee rai tama tuir idak-idak nia kintál, estraga mós ai-oan balun, tan ne’e mak ha’u husu ita hotu nia kooperasaun, tanba bee-moos ba imi hotu la’ós ba ema seluk, iha problema karik tuur hamutuk buka solusaun, lalika impede projetu ne’e,” nia apela.
Notísia relevante:Rogério Lobato prioriza bee-moos nu’udar ajenda prinsipál iha RAEOA
Iha biban ne’e, Xefe SAS Oekusi, José Ili, informa, projetu reabilitasaun bee-moos Oélnipsain, atu benefísia komunidade uma-kain 120, tanba kompañia sei reabilita hahú husi bee-matan to’o torneira sira hamutuk ualu iha komunidade nia uma oin.
Nune’e mós projetu reabilitasaun bee-moos Oéleu atu dada ba uma-kain 150 no sei monta torneira 23 inklui edifísiu jestór sub-rejiaun Nítibe no mós komandu PNTL Eskuadra Nítibe nian.
“Nu’udar parte Governu, SAS sei monitoriza liuliu instalasaun sira, tanba bee-matan rua ne’e, tinan barak enfrenta problema iha kanu, entaun komunidade hatama proposta iha 2024, ita aposta kedas iha orsamentu 2025, ne’e mak ohin ita mai halo lansamentu,” nia informa.
Komunidade Sufleos, nu’udar mós koordenadór be jestaun bee-moos iha aldeia Quibiselo, sente orgullu, tanba bee-matan Oélnipsan konstrui kedas iha 2010 husi programa USAID liuhusi programa Fornesimentu Bee-moos, Saneamentu Ijiéne no Jestaun Rekursu Naturál (DWASH).
“Ami agradese tanba tinan-15 ona, ohin Governu tau matan atu hadi’a, tanba kanu sira mak hetan estragu husi dezastre naturál, dalaruma torneira sira aat, maibé laiha manutensaun, tan ne’e mak tinan kotuk ami hatama proposta, no ohin mai hadi’a ona,” nia orgullu.
Notísia relevante:Rogério Lobato vizita populasaun iha suku Usitaqueno no rona sira-nia preokupasaun
Entretantu, projetu reabilitasaun sistema bee-moos Oélnipsan iha aldeia Quibiselo suku Bobometo sub-rejiaun Oésilo, ezekuta husi kompañia lokál Kolo Hau Sus Unipesoál Lda ho valór kontratu $40,631.73 ho nia durasaun serbisu fulan neen, hahú husi 22 Jullu 2025 sei konklui iha 22 Fevereiru 2026.
Projetu reabilitasaun sistema bee-moos Oéleu iha suku Bene-Ufe sub-rejiaun Nítibe ezekuta husi kompañia Aluman Enklave Unipesoál Lda, ho valór kontratu rihun $40-resin, ho nia durasaun serbisu fulan neen, hahú husi 22 Jullu 2025 sei konklui iha 22 Fevereiru 2026.
Jornalista: Abílio Elo Nini
Editór: Rafael Ximenes de A. Belo
