KRAM konsidera Lei Arte Marsiál nesesáriu hodi kontrola membru OAM
DILI, 14 Agostu 2025 (TATOLI)—Komisaun Reguladora Arte Marsiál (KRAM) konsidera Proposta Lei Arte Marsiál nesesáriu tanba bele regulariza membru Organizasaun Arte Marsiál (OAM) ne’ebé dezobidiénsia ba Estadu.
Prezidente KRAM, Octavio da Conceição esplika Proposta Lei Arte Marsiál sei iha faze prosesu no bainhira aprova ona iha Parlamentu Nasionál (PN) sei kria komisaun rua hanesan Komisaun Monitorizasaun no Fiskalizasaun Pratika Arte Marsiál ne’ebé sei tutela ba Ministériu Interiór (MI) no Komisaun Reguladora Desportu Arte Marsiál ne’ebé futuru tutela iha Ministériu Juventude, Desportu, Arte no Kulturál (MDJAK).
“Bainhira aprova ona, sei mudansa naran ba Komisaun Reguladora Desportu Arte Marsiál nune’e ita sei rejista foun fali. Re-rejistu fali ba OAM atu foku de’it ba desportu,” Prezidenti KRAM hateten iha ninia kna’ar fatin, MJDAK, Lesidere, Kuarta ne’e.
Octavio esplika proposta lei referida sei foku liubá atitude ka komportamentu hotu husi kada OAM sira-ne’ebé la kumpri regra loloos, sei regulariza tuir baze legál hanesan bainhira membru hirak-ne’e dezobidiénsia ba orden, sei kontrola husi Komisaun Monitorizasaun no Fiskalizasaun Pratika Arte Marsiál ne’ebé sei tutela ba MI.
Notísia relevante: KRAM koordena ho PNTL Bobonaro kontrola arte-marsiál ne’ebé kontinua treina subar
Enkuantu, OAM ne’ebé la kumpri regra durante pratika Arte Marsiál sei kontrola husi Komisaun Reguladora Desportu Arte Marsiál ne’ebé futuru tutela iha MJDAK.
Aleinde ne’e, Governu liuhosi MJDAK sei investe ba desportu modalidade silat hanesan pratika treinu iha loron no definisaun fatin ho loloos nune’e bele kontrola pratika atividade silat hahú husi postu administrativu, munisípiu to’o nasionál.
Octavio informa katak durante proposta lei referida seidauk aprova iha PN, KRAM kontinua kontrola bazeia ba rezulusaun númeru 22/2025 kona-ba suspensaun Organizasaun Arte Marsiál hanesan aplika ba sidadaun sira-ne’ebé nafatin hakat fronteira ba Indonézia partisipa graduasaun ne’ebé konsideradu dezobidiénsia ba órgaun Estadu.
Nia haktuir PNTL hamutuk ho Migrasaun asegura ona membru Arte Marsiál hamutuk 200-resin iha fronteira Salele (Munisípiu Kovalima), Batugadé, Maliana no iha Aeroportu Internasionál Prezidente Nicolau Lobato bainhira ultrapasa migrasaun hafoin partisipa graduasaun iha Indonézia.
Entertantu, Governu iha loron-30 Jullu aprova ona proposta lei kona-ba Rejime Jurídiku Arte Marsiál ne’ebé aprezenta husi MI nune’e iha tempu badak sei hala’o diskusaun iha Parlamentu Nasionál hodi hetan apresiasaun.
Proposta lei ne’e ho objetivu atu foku ba Rejime Jurídiku ne’ebé klaru ba ensinu aprendizajen no pratika Arte Marsiál iha Timor-Leste nune’e bele garante seguru, ordenadu no tuir prinsípiu orden públiku.
Jornalista: Natalino Belo
Editór: Xisto Freitas da Piedade
