Padre Albertin husu F-FDTL banati tuir espíritu FALINTIL
AINARU, 19 Agostu 2025 (TATOLI)-Pároku ba Igreja Santa Maria Ainaru, Amu Albertin Franco Morato, husu ba Forsa Defeza Timor-Leste (FDTL) atu banati tuir espíritu FALINTIL nian iha tinan 50 liuba ne’ebé saran-án hodi liberta nasaun no povu husi okupasaun.
“Ema dehan domin boot liu mak ema ne’ebé oferese nia-án hodi ema seluk moris. Hanesan Nai Jesus ne’ebé saran nia-án hodi ita moris”, Amu hatete liuhusi nia omilia bainhira selebra misa agradesimentu komemorasaun loron FALINTIL.
Amu selebrante ne’e hatutan: “laiha domin ne’ebé boot liu duké ema ne’ebé saran nia-án ba ema hodi ema seluk bele moris. Ida ne’e refleta ba FALINTIL sira iha tinan 50 liuba liuhusi eroi no eroina sira hatudu liuhusi FALINTIL, ohin ita moris nu’udar nasaun independente ida”.
Atividade komemorasaun loron FALINTIL ba da-50 ne’ebé halo iha munisípiu Ainaru hahú ho misa agradesimentu ne’ebé halo iha Igreja Santa Maria, hahú tersa-ne’e iha tuku 7:30, partisipa husi autoridade sivil, militár inklui estudante sira.
“Forsa Defeza Timor-Leste tenke banati tuir espíritu, dedikasaun no domin ne’ebé uluk eroi no eroina FALINTIL halo hodi serbí povu rai ida-ne’e ho di’ak tuir prinsípiu FALINTIL nian”, nia afirma.
Nia husu ba povu atu valoriza no dignifika loron FALINTIL tanba loron ida-ne’e mak FALINTIL sira dedika sira-án liuhusi domin ne’ebé sira iha hodi liberta povu.
“Loron ohin ita tenke valoriza no fó onra ba sira (FALINTIL) ho sira-nia domin mak ohin ita hanesan nasaun independente ida iha mundu”, akresenta amu selebrante.
Padre Parókia Ainaru ne’e husu ba F-FDTL atu harii pás iha sosiedade no mundu tuir tema tinan-ne’e “Pas ao mundu”.
Amu Albertin Franco Morato konsidera pás ne’e difísil, tanba ne’e inan-aman no família sira hotu inklui forsa defeza sira tenke harii dame iha instituisaun no sosiedade.
Hafoin missa, autoridade sivil, militár, estudante no veteranu sira inklui komunidade kontinua halo marsa husi Ainaru Vila ba kampu parada no kontinua ho parada militár ne’ebé halo iha kampu futeból Ainaru hodi komemora loron FALINTIL ne’ebé halo iha kampu munisípiu Ainaru.
Hafoin ne’e, autoridade sivil no militár ikontinua lori ai-funan ba jardín eroi munisípiu Ainaru hodi signifika no valoriza aas-uain FALINTIL sira no taka ho divertimentu.
Notísia relevante: Komemora loron FALINTIL ba dala-50, Autoridade Vikeke realiza marsa populár
Jornalista : Natalino Costa
Editora : Rita Almeida
