CONTL rejista ona modalidade 13 kompete iha SEA Games 2025
DILI, 25 Agostu 2025 (TATOLI)–Segundu Vise Komite Olímpiku Nasionál Timor-Leste (CONTL, sigla portugés), Vicente Carvalho, hateten CONTL halo ona rejistrasaun ba modalidade hamutuk 13 ne’ebé konfirmadu atu kompete iha jogu SEA Games tinan 2025, ne’ebé sei hala’o iha nasaun Tailándia fulan-Dezembru mai ne’e.
Notísia Relevante: Kampionatu nasionál atletizmu prepara atleta ba jogu CPLP-Sea Games 2025
Vicente esplika, husi modalidade 13 ne’e iha modalidade lima (5) mak Governu liuhusi Ministériu Juventude Desportu Arte no Kultura (MJDAK) mak finansia no seluk ne’e kada federasaun mak responsabiliza.
“Ita halo hotu ona rezistrasaun ba modalidade hamutuk 13. husi modalidade 13 ne’e iha modalidade lima (5) mak Governu liuhusi Ministériu Juventude Desportu Arte no Kultura (MJDAK) mak finansia no seluk ne’e kada federasaun mak responsabiliza ka federasaun mak selu rasik atu ba tuir kompetisaun ne’e,” Vicente hateten ba jornalista sira iha edifisiu CONTL, Kolmera, segunda ne’e.
Nia dehan, númeru ba atleta seidauk hatene tanba sei iha prosesu nia laran no bainhira desizaun ikus mak sei deside loloos númeru atleta sira-ne’ebé atu partisipa SEA Games.
Modalidade lima ne’ebé Governu finansia mak hanesan Atletizmu, Futeból, Karate-do, Taekwondo no Boxe, enkuantu modalidade seluk ne’ebé federasaun finansia rasik mak hanesan Wrestling, Modern Pentahlon, Natasaun, Siklizmu, Weightlifting, E-sport, Kabadi no Archery.
“Sira ida selu rasik ne’e tanba sira hetan apoiu finanseiru husi sira-nia federasaun internasionál. Hanoin ida ne’e di’ak liutan tanba sira iha ligasaun ne’ebé di’ak tebes. Sira-ne’e prienxe hotu rekezitu. Governu laharee ba sira-ne’e tanba Governu la fó apoiu ba kampionatu nasionál, maibé maioria sira-ne’e atividade internasionál sira sempre marka prezensa,” nia dehan.
Tuir nia, federasaun barak iha Timor-Leste ladun iha ligasaun di’ak ho federasaun internasionál ho nune’e mak susar atu lobi hodi hetan apoiu ruma.
“Federasaun barak iha ne’e ladun iha ligasaun di’ak ho federasaun internasionál, nunka tuir asembleia jerál sira nian, entaun susar atu hetan apoiu sira hanesan ne’e. Federasaun balun ativu loos, sira iha lina koordenasaun di’ak ho sira-nia federasaun internasionál, entaun sira hetan apoiu husi li’ur,” nia dehan.
Alende ne’e, nia relata, iha semana kotuk ekipa CONTL partisipa iha reuniaun entre komisaun sira hodi diskute kona-ba aspeitu hotu ne’ebé sei hala’o iha jogu referidu.
Enkontru entre Xefe Misaun sira kada nasaun kona-ba jogu ne’e, hodi diskute aspetu tékniku no operasionál xave sira-ne’ebé relasiona ho organizasaun SEA Games 2025 nian. Enkontru ne’e foka liu ba área importante sira hanesan Jestaun Jogu sira, Aspetu Tékniku sira Desportu nian, Atleta no Alojamentu Ofisiál no Transporte no Lojístika
Komisaun Organizadora aprezenta vizaun jerál kompreensivu ida kona-ba Estadu atuál preparasaun nian, ho énfaze partikulár ba fatin sira kompetisaun nian, lojístika eventu nian, no prontidaun infraestrutura nian.
Tailándia, nasaun uma-na’in ba Jogu SEA 2025, konfirma katak jogu sira sei hala’o iha sidade boot tolu hanesan sidade Chonburi, Songkhla no sidade Bangkok, no jogu sir- ne’e sei hala’o iha 09-20 Dezembru 2025.
Jornalista : Hortencio Sanchez
Editór : Cancio Ximenes
