Federasaun Natasaun prepara ona atleta na’in-rua kompete iha SEA Games 2025
DILI, 25 Agostu 2025 (TATOLI)–Prezidente Federasaun Natasaun Timor-Leste (FNTL), Laurentino Guterres, FNTL prepara ona atleta na’in-rua (2) hodi kompete iha eventu SEA Games 2025 ne’ebé realiza iha nasaun Tailándia iha Dezembru 2025.
Notísia Relevante: CONTL rejista ona modalidade 13 kompete iha SEA Games 2025
“Natasaun, ita prepara ona atleta na’in-rua (2) ne’ebé kompostu husi feto ida (1) no mane ida (1). Sira-ne’e kualifikadu hodi reprezenta Timor-Leste iha SEA Games iha modalidade Natasaun nian,” Laurentino hateten ba Agência TATOLI iha Kolmera, segunda ne’e.
Nia dehan, atleta na’in-rua (2) ne’e dezloka ona fulan-kotuk ba Filipina hodi hala’o preparasaun, nune’e fulan-Dezembru mai ne’e bele kompete iha jogu referidu.
“Ita-nia atleta na’in-rua (2) ne’e fulan kotuk kedan ba ona iha Filipina hodi halo preparasaun. Atleta na’in-rua (2) ne’e mak Salena no Jolanio. Sira ba halo preparasaun iha ne’ebá tanba ita ko’alia ho Federasaun Natasaun Filipina nian fasilita sira bele halo treinamentu iha ne’ebá,” nia dehan.
Atleta na’in-rua (2) ne’e, nai dehan, iha fulan kotuk mós partisia iha eventu internasionál natasaun nian iha Singapura no ramata husi eventu ne’e mak kontinua kedan ba halo preparasaun iha Filipina.
“Razaun, ita haruka sira ba halo treinamentu iha ne’ebá tanba ita laiha infraestrutura hanesan Pisina ida-ne’ebé estandarte internasionál, entaun ita tenke haruka sira ba treinu iha li’ur. Ita iha treinadór na’in-rua mak akompaña hela sira. Ita fiar katak ho preparasaun ne’ebé iha sira bele kompete ho di’ak iha eventu mai ne’e,” nia hateten.
Jogu SEA Games ba tinan id- ne’e sei kompete entre nasaun membru ASEAN sira hanesan Kamboja, Laos, Vietname, Indonézia, Singapura, Tailándia, Malázia, Filipina, Myanmar, Brunei Darusalam no Timor-Leste.
Jornalista : Hortencio Sanchez
Editór : Cancio Ximenes
