OEKUSI, 27 Agostu 2025 (TATOLI) – Advogadu privadu husi empreza internasionál Seagell Resort, Octavio Cardoso konsidera asaun buska no apreensaun ne’ebé halo husi Polísia Siéntifika Investigasaun Kriminál (PSIK), hamutuk ho Serbisu Nasionál Intelejénsia (SNI), laiha lejitimidade tanba laiha mandadu husi tribunál.
Notísia relevante:PSIK ho SNI buska apreensaun no desmantela jogu online ilegál iha Oekusi
Tuir nia, prosesu ne’e sei hamosu dúvida, intermus prosesiál tanba regra estabelesementu atividade online iha otél Oé-Upun iha dokumentu lisensa, hodi hala’o serbisu, no kumpre mós prosesu administrativu.
Nune’e nia espera katak, karik iha provasaun ruma, relativamente ho prosesu ne’e, sei hetan nia rezultadu iha tribunál.
“Ita buska apreensaun domisiliáriu ba iha fatin sira hanesan ne’e, aleinde hanaesan fatin serbisu, tenke hetan autorizasaun iha mandadu husi tribunál, ne’e kódigu penál mak haruka no ami liu ona esperiénsia hanesan ne’e, katak abitualmente kuandu halo buska hanesan ne’e, tenke komunika ema nia mandatária iha oin, molok ita atu buska, revista halo identifikasaun, alista sasán sira-ne’ebé mak deskonfia iha, uza ba atividade krime presiza ema-nia mandatária iha oin,” nia dehan iha otél Oé-Upun, ohin.
“Maibé, kuandu halo hanesan ne’e, ba ha’u, sei prejudika prosesu iha futuru, ha’u firme ba nia kódigu prosesuál, ha’u la ko’alia interrese polítiku, maibé ha’u firme ho prosesuál, katak ida-ne’e, laiha lejitimidade ba iha asaun ne’ebé mak akontese ona iha ne’e,” nia afirma.
Nia konsidera, ekipa konjunta ne’ebé lidera husi PSIK no SNI halo detensaun ba ema na’in-10 iha otél Oé-Upun hodi hein prosesu kontinuasaun ba tribunál, nia konsidera ilegál.
Notísia relevante:PSIK aprezenta ona objetu apreensaun ba Ministériu Públiku Oekusi
Entretantu, segunda kalan, 25 Agostu 2025, Polísia Siéntifika Investigasaun Kriminál (PSIK), hamutuk ho Serbisu Nasionál Intelejénsia (SNI) hala’o vizita supreza ida, hodi halo buska no apreensaun no desmentela ba jogu online rua hanesan esplorasaun jogu ilisita kriminoza jogu online, no mós burla informatika, rede scam call center transnasionál, ne’ebé instala husi empreza internasionál Seagull Resort husi Malázia iha otél Oé-Upun Rejiaun Administrativa Espesiál Oé-kusi Ambeno (RAEOA).
Atividade esplorasaun jogu ilisita no kriminoza ne’e, ekipa PSIK no SNI konsege halo apreensaun ba objetu ka evidénsia sira hanesan, desktop unidade 87, laptop 13, telemovel iha 194, flash-disk tolu (3), pontu asesu (acces point) ka wifi ida (1), starlink router rua (2) no mós simcard Telkomsel Indonézia nian 135.
Objetu ba atividade burla informátika halo apreensaun ba desktop 58, laptop haat (4), mákina impresora ida (1), mákina sura osan ida (1), acces point rua (2) no mós telemovel iha 44.
Purtantu, tuir orariu, iha kinta-feira dadeersan, 28 Agostu 2025, ekipa konjunta husi PSIK no SNI sei aprezenta detidu sira iha Tribunál Primeira Instánsia Oekusi hodi kumpre prosesu primeiru interrogatóriu.
Notísia relevante:PSIK ho SNI monta ona liña polisiál ba eskritóriu rua iha otél Oé-Upun
Jornalista: Abílio Elo Nini
Editór: Rafael Ximenes de A. Belo
