Embaixadora Manuela Bairos konsidera PM sai aliadu fundamentál ba Portugál

DILI, 01 Setembru 2025 (TATOLI)—Embaixadora Portugál iha Timor-Leste, Manuela Bairos, hateten Primeiru Ministru Kay Rala Xanana Gusmão sempre sai aliadu fundamentál tebes ba Portugál.

Embaixadora hato’o kestaun ne’e bainhira hala’o sorumutu no vizita despedida tanba nia sei husik Timor-Leste iha semana rua nia laran, hafoin nia hala’o mandatu hanesan Embaixadora Portugál iha Timor-Leste durante tinan tolu ho balun nia laran.

“Tanba ne’e, ha’u mai liuliu atu agradese ba ita-boot sira-nia kolaborasaun exelente hodi povu Timor nia naran, Primeiru-Ministru sempre sai aliadu fundamentál tebes ba Portugál,”  Embaixadora ne’e informa ba jornalista sira hafoin ramata ekontru iha Palásiu Governu, ohin.

Aleinde ne’e, diplomata ne’e mós hakarak hato’o agradesementu ba doasaun laran-luak ne’ebé halo ba Portugál ba inséndiu sira iha Portugál, ne’ebé foin lalais Governu Timor-Leste fó no parte seluk mak kolaborasaun hodi realiza konferénsia komunidade luzófonu sira-nian, jogu Komunidade Ko’alia lian Portugés (CPLP) nian no buat furak hotu-hotu ne’ebé akontese durante ninia mandatu iha Timor-Leste.

Nia dehan, sai hanesan konversa ida-ne’ebé nakloke tebes kona-ba relasaun sira entre nasaun maun-alin rua, nasaun rua ne’ebé fiar malu iha sira-nia futuru, hodi fahe dezafiu sira liuliu iha área edukasaun nian ne’ebé mak sira-nia prioridade prinsipál.

“Tanba ne’e, bázikamente hanesan mós revizaun ida kona-ba tinan tolu ho balun ne’ebé ha’u hala’o iha Timor-Leste,” nia dehan.

Nia hatutan, ida-ne’e envolve tebes no hanoin ida-ne’e hatudu katak iha buat barak liután iha patrimóniu la’ós de’it patrimóniu ne’ebé harii ona, edifísiu ida-ne’e maibé mós patrimóniu afetu nian.

“Tanba ne’e, mensajen ne’ebé ha’u hakarak hato’o mak agradesementu,” nia hateten.

Jornalista : Alexandra da Costa

Editór       : Cancio Ximenes