Empoderamentu ekonomia no jestaun rurál sai prioridade atu estabelese iha Oekusi
OEKUSI, 08 Setembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio Servantes Romeia da Cruz Salu, promete sei estabelese tan grupu traballu tékniku ida atu trata asuntu ba empoderamentu ekonomia no jestaun rurál.
Tuir Prezidente Autoridade ne’e katak, asuntu empoderamentu ekonomia, presiza estabelese tanba maioria povu Oekusi moris ho vida agrikultura.
“Semana ne’e, ita foku ba serbisu desentralizasaun no podér lokál, entaun semana oin ita sei tuur hamutuk entre parseiriu sira hotu, nune’e ita harii grupu traballu tékniku ida ba asuntu empoderamentu ekonómia no jestaun rurál,” nia dehan iha Oekusi, ohin.
Notísia relevante:PM Xanana atribui prioridade neen ba PA RAEOA ezekuta durante fulan tolu
Nia informa, objetivu husi estabelesimentu ekipa traballu ba asuntu empoderamentu ekonomia no jestaun rurál ne’e, atu sai matadalan ba Oekusi Ambeno.
“Ne’e nia intensaun atu halo saida? Atu sai hanesan matadalan tékniku institusionál dinamizadora ho forsa administrasaun públiku nia instituisaun, atu serbisu ho ita-bo’ot sira, haree ami nu’udar parseiriu ativu la depende ba imi fó osan mak ami sa’e karreta no motor, maibé ita bele sai parseiru ativu nune’e ita bele atende no aselera problema ki’ak no problema rai-maran. Ida-ne’e, orienta ita atu bele hamatak fila-fali povu nia moris, liuhusi ita-nia serbisu,” nia promete.
Notísia relevante:PA RAEOA sei estabelese grupu tékniku aselera poder lokál no desentralizasaun
Jornalista: Abílio Elo Nini
Editór: Rafael Ximenes de A. Belo
