OEKUSI, 23 Setembru 2025 (TATOLI) – Sekretáriu Estadu Inkluzaun (SEI), fasilita formasaun hodi kapasita feto potensiál sira hamutuk na’in-45 iha Rejiaun Administrativa Espesiál Oekusi Ambeno (RAEOA) kona-ba desizaun no partisipasaun feto iha polítika, atu prepara implementasaun desentralizasaun no podér lokál.
Notísia relevante: https://tatoli.tl/2025/02/03/mae-atribui-desentralizasaun-administrativa-instituisional-ba-munisipiu-sira/
Xefe Departamentu Empoderamentu Feto iha Empoderamentu Feto Partisipasaun Polítika iha SEI, Abia Brito de Araújo Costa, informa, formasaun ne’e, realiza durante loron tolu, hahú segunda sei termina iha kuarta semana ne’e.
“SEI iha mandatu tinan lima, iha programa prioridade lima, ida mak hakbiit feto nia partisipasaun iha vida polítika. Entaun, formasaun ne’e nia objetivu atu enkoraza no motiva feto sira-nia partisipasaun másima liután iha eleisaun desentralizasaun no podér lokál,” nia dehan iha salaun edukasaun Oekusi, ohin.
Tanba haktuir iha polítika Governu katak, eleisaun ba desentralizasaun no podér lokál sei realiza iha 2027 to’o 2028, entaun SEI iha kompromisu atu hasa’e nafatin koñesimentu feto potensiál sira, iha munisipíu inklui RAEOA atu hasa’e koñesimentu iha nível foti desizaun ba partisipasaun iha polítika nian.
“Ami prepara matéria hitu ligasaun ho lideransa, maibé primeiru hahú uluk ho konseitu gender (jéneru) báziku, depois hasa’e partisipasaun feto iha nível polítika enkuadramentu legál sira-ne’ebé presiza suporta (apoia) asegura feto sira-nia partisipasaun iha polítika. Ami mós prepara matéria kona-ba komunikasaun di’ak, public speaking, advokasia, ne’ebé pertinente ba feto sira atu-bele hakbiit sira-nia atividade bainhira kandidata aan iha eleisaun ruma,” nia hateten.
Notísia relevante: https://tatoli.tl/2025/02/11/horta-apresia-lideransa-feto-hatudu-progresu-servisu-ho-kualidade/
Iha biban ne’e, Prezidente Asosiasaun Feto Poténsia RAEOA, Joana Bobo Tanu, sente orgullu tanba polítika Governu liuhusi SEI tanba bele promove papél feto sira iha nível foti desizaun polítika no mudansa ekonomia nu’udar preparasaun ba futuru.
“Feto sira ohin partisipa ne’e, ami identifika mai husi feto Konsellu-Suku tanba sira mak besikliu komunidade iha baze, entaun sira-ne’ebé mai partisipa iha formasaun ne’e, mai husi delega kada aldeia no juventude kada suku, enkaixa mós ofisiál apoia suku sira, tanba liuhusi formasaun ne’e, fó oportunidade mai ami, atu ba oin ami mós bele foti desizaun no partisipa iha vida polítika nu’udar preparasaun ida mós ba implementasaun podér lokál no desentralizasaun,” nia orgullu.
Enkuantu, Diretór Jerál Komisaun Funsaun Públika, Domingos Punef, reprezenta Prezidente Autoridade RAEOA, konsidera formasaun ne’e nesesáriu, atu haforsa kapasidade feto sira atu kompete iha futuru.
“Agradese tanba RAEOA hetan oportunidade di’ak, tanba forma no prepara no haforsa feto sira iha baze ba planu futuru, tan ne’e liuhusi formasaun ne’e, bele fanun ina feto, katak feto mós bele kompete ho mane sira iha foti desizaun no involve iha polítika,” nia katak.
Notísia relevante: https://tatoli.tl/2025/07/16/dezenvolve-ekonomia-familia-afmef-eleva-abilidade-grupu-feto-iha-oekusi/
Jornalista: Abílio Elo Nini
Editór: Rafael Ximenes de A. Belo
