Autoridade Vikeke disemina jestaun patrimóniu Estadu ba funsionáriu sira
VIKEKE, 29 Setembru 2025 (TATOLI)—Autoridade Munisípiu Vikeke liuhusi Diresaun Lojístika no Partrimóniu, Segunda ne’e, realiza diseminasaun kona-ba jestaun patrimóniu Estadu no regulamentu veíkulu Estadu ba funsionáriu diresaun sira inklui postu administrativu lima.
Objetivu husi diseminasaun ne’e, atu funsionáriu kada diresaun sira bele komprende regulamentu ba utilizasaun veíkulu Estadu nian.
Prezidente Autoridade Munisípiu (PAM) Vikeke, Francisco Cruz Simões de Gonzaga Soares haktuir diseminasaun ne’e sai hanesan oportunidade ida ba jestaun veíkulu Estadu nian tanba iha padraun operasaun hodi uza veíkulu estadu nian.
“Ita tenke fahe servisu liuliu Diresaun Lojístika no Patrimóniu. Se ita-boot sira konsentra de’it iha edifísiu ita la konsege halo kontrolu ba veíkulu Estadu nian ne’ebé destaka iha Munisípiu Vikeke. Tanba ne’e, ha’u husu Diresaun Lojístika no Patrimóniu foti funsionáriu kada diresaun hodi indika sira sai hanesan pontu vogál lojístika nian iha kada diresaun, nune’e ita kontinua halo kontrolu ba patrimóniu Estadu nian,” Francisco hateten iha salaun Terami, Beloi, Vikeke, Segunda ne’e.
Francisco hatutan daudaun ne’e autoridade fó-sai ona karta sirkulár ba karreta no motorizada labele halo movimentu iha oras serbisu nian, maibé motorizada barak mak sei para iha uma, utiliza ba paseiu.
“Tanba ne’e mak ha’u hanoin Diresaun Lojístika no Patrmóniu la konsege halo kontrolu ba veíkulu Estadu nian iha munisípiu Vikeke. Nune’e, ha’u husu ba Diresaun Lojístika no Patrimóniu Estadu tenke na’in ba sasán bens e moveis hodi halo kontrolu másimu,” nia subliña.
Iha fatin hanesan, Diretór no Lojístika no Patrimóniu Munisipál Vikeke, António Amaral hateten diseminasaun ne’e foka liubá utilizasaun patrimóniu Estadu hanesan veíkulu kompostu husi motorizada no karreta sira-ne’ebé durante ne’e servisu munisipál no delegasaun territória sira uza dala barak sees husi regra sira.
“Tanba ne’e, liuhusi oportunidade ida-ne’e, ami atu introdús regra sira ba diresaun sira hodi komprende uza veíkulu Estadu nian. Tan ne’e, ami konvida kada diresaun sira hodi uza veíkulu Estadu bazeia ba regulamentu sira-ne’ebé mak iha no diresaun sira tenke komprende regulamentu no prosedementu sira,” nia esplika.
Kona-ba baze legál ba regulamentu veíkulu Estadu mak hanesan:
(1) Dekretu-Lei númeru 8/2003, 18 Juñu, kona-ba atribuisaun no utitilizasaun veíkulu Estadu; (2) Dekretu-Lei númeru 32/2011, 27 Jullu, kona-ba jestaun no alienasaun beins e moveis; (3)Diploma-Ministriál númeru 15/2012, 29 Maiu, kona-ba rejime jestaun, no alienasaun beins e moveis;
(4) Rozulusaun Governu núméru 130/2021, 29 Setembru, kona-ba jestaun no realokasaun veíkulu Estadu.
Tuir dadus, veíkulu sira ne’ebé daudaun ne’e iha Munisípiu Vikeke kompostu karreta operasionál totál hamutuk unidade 30. Husi númeru ne’e karreta ambulánsia hamutuk unidade 11, motorizada hamutuk unidade 264, motorizada hamutuk unidade 88 mak submete ba lelaun.
Entretantu, diseminasun ne’e partisipa husi diretór kada diresaun munisipál no territoriál, reprezentante kada postu no funsionáriu sira.
Jornalista: Vitorino Lopez da Costa
Editór: Xisto Freitas da Piedade
