AIFAESA halo levantamentu dadus ba bee “Fresca” no foos “Beruang Merah”
DILI, 30 Setembru 2025 (TATOLI)—Autoridade Inspesaun no Fiskalizasaun Atividade Ekonómika Sanitária no Alimentár (AIFAESA, sigla portugés), kontinua halo levantamentu dadus ba produtu bee Fresca no fós ho Marka Beruang Merah, tanba hetan keixa barak husi konsumidór sira.
Notísia Relevante: Empreza Starking koopera ho AIFAESA rekolla AQUASE ne’ebé kontaminadu ho baktéria
Inspetora Jerál Autoridade Inspesaun no Fiskalizasaun Atividade Ekonómika Sanitária no Alimentár, Odete Viegas, informa ba públiku katak bainhira AIFAESA hetan keixa husi komunidade relasiona ho produtu sira-ne’ebé estragadu no la ijiéne, entaun sira atua diretamente liuhusi ekipa inspesaun sira, hanesan bee ho marka Fresca inklui fos ho marka Beruang merah.
Kona-ba bee ho marka Fresca ne’e ekipa sira ba halo kedas inspesaun iha fatin produsaun nian iha Beduku no empreza hateten katak bee aqua ne’ebé sirkula iha ne’e barak liu mai husi rai-li’ur, entaun empreza sira daudaun ne’e halo rasik sira nia ezemplu masa (bottle) bee ne’e rasik.
“Ami mós husu ba sira tanbasá mak bee nia (bottle) matan kuak no ida-ne’e ita seidauk tama iha prosesu finál ne’ebé presiza esplikasaun, entaun daudaun ne’e ekipa sira halo hela relatóriu. Relatóriu finál seidauk finaliza maibé importante ita identifika ona,” Inspetora Jerál ne’e hateten ba jornalista sira iha nia kna’ar fatin, Matadoru, ohin.
Entretantu, nia informa, kona-ba produtu fos ho marka Beruag Merah mós ekipa AFAESA halo hela levantamentu dadus, tanba fós ne’e mós la’ós sirkula de’it iha fatin ida maibé sirkula ba fatin barak, nune’e sira sei halo investigasaun, bainhira relatóriu iha ona mala prosesu tuir mai sei fó sai ba mídia sira.
Aleinde ne’e, AIFAESA mós halo inspesaun ba bee galung sira-ne’ebé produs iha rai-laran inklui ne’ebé importa husi rai-li’ur, no ekipa sira foti ona amostra husi kada produtu bee galung haruka ona ba teste laboratóriu iha Indonézia.
“Rezultadu haruka ona mai no sei kompila hela tanba ami sei halo leitura ba rezultadu sira-ne’e. Iha tempu badak, ami sei fó sai kualidade no produtu sira-ne’e prienxe ona kritéria ba konsumu ka lae,” nia dehan.
Entretantu bee galung husi empreza 11 ne’ebé AIFAESA foti nia amostra mak hanesan bee ho marka Top Fresh, VIP, Iramor, Aquafu, Wemor, Coold, H20, Agua, Gota, Leste no Aquase. Husi empreza 11 ne’e kompostu husi sasán produsaun rai-laran hamutuk 10 no sasan importasaun hamutuk ida (1) mak bee ho marka Aquase.
Jornalista : Alexandra da Costa
Editór : Cancio Ximenes
