OEKUSI, 30 Setembru 2025 (TATOLI) – Autoridade komunitária sira iha Sub-rejiaun Nítibe, Rejiaun Administrativa Espesiál Oekusi Ambeno (RAEOA), rekomenda ba Xefe Estadu Maior Jenerál, FALINTIL-Forsa Defeza Timor-Leste (F-FDTL), Tenente Falur Rate Laek, ba futuru katak karik, loke vaga ba rekrutamentu membru F-FDTL foun, fó prioridade ba suku sira-ne’ebé baliza direita ho nasaun viziña.
Notísia relevante:Komandu F-FDTL apoia materiál desportiva ho livru istória ba EBF Bítila
Xefe Suku Bene-Ufe, Marcos Meni, hato’o nia rekomendasaun ba Tenente Falur Rate Laek ne’e, perante diálogu aberta ho komunidade sira iha Eskola Bázika Filiál (EBF) Bitila suku Bene-Ufe foin lalais ne’e.
“Iha oportunidade ne’e, ha’u rekomenda direita ba Tenente Jenerál, karik iha rekrutamentu membru F-FDTL iha 2026, favór tau netik atensaun ba ami suku sira iha fronteira, la’ós suku Bene-Ufe de’it maibé iha territóriu, ne’ebé baliza direita ho nasaun viziñu. Ami rekomenda la’ós tanba problema iha fronteira maibé sira mak hatene ambiente no situasaun reál iha fronteira,” nia rekomenda iha ámbitu diálogu hala’o iha Eskola Bázika Filiál Bítila.
Iha fatin hanesan, Jestór sub-rejiaun Nítibe, Agustinho Afulit, sujere ba Xefe Estadu Maior, atu ba oin tau matan nafatin liña fronteira sira iha Nítibe, tanba iha suku lima ho aldeia 17, maibé suku haat mak baliza direita ho nasaun viziñu hanesan Kupan no TTU Kefamenanu, mak hanesan suku Ban-Afi, Lela-Ufe, Bene-Ufe no suku Usitaku.
“Tanba ne’e ami rekomenda , ba oin karik iha oportunidade husi F-FDTL, halo favór tau matan netik ba suku sira iha fronteira, la’ós fatin sira-ne’e baze ba funu maibé atu sai matadalan, karik aban bairua vizita na’i-ulun sira mai ne’e, nu’udar sidadaun hatene kondisaun ambiente no karaterístika iha liña fronteira,” nia dehan.
Notísia relevante:Tenente Jenerál Falur Rate Laek vizita komunidade sira iha Naktuka
Hatan ba rekomendasaun sira-ne’e, Xefe Estadu Maior Jenerál, FALINTIL-Forsa Defeza Timor-Leste (F-FDTL), Tenente Falur Rate Laek, klarifika katak, sistema rekrutamentu ba F-FDTL uza sistema proporsionál, ne’ebé kada suku iha nia reprezentante.
“Ha’u responde autoridade sira-nia rekomendasaun, katak ami uza sistema proporsionál, fahe ema, suku, postu administrativu to’o munisipu sira, ninia reprezentasaun tenke tama iha forsa, maibé iha nia kritériu, tenke sidadaun timoroan, tenke saúde di’ak no kritériu seluktan,” nia hateten iha iha suku Bene-Ufe.
Tenente Falur, konfirma, katak prosesu atu tama forsa iha nia kritériu, entaun hotu-hotu tenki ba konkorre, depois balun sei la liu entaun ida ka rua bele liu, tanba ne’e mak forsa nia reprezentasaun iha suku aldeia hot-hotu tenki iha, labele tama iha grupu arte marsiál halo krime iha vida sívil inklui kritériu seluktan.
“Tanba ne’e, ha’u mós hakarak rekomenda, kuandu loke vaga atu tuir teste, suku sira iha fronteira, feto no mane tenke barak mak konkorre, nune’e balun laliu karik iha rua ka tolu bele liu,” nia katak.
Jornalista: Abílio Elo Nini
Editór: Rafael Ximenes de A. Belo
