DILI, 03 Outubru 2025 (TATOLI)—Autoridade Inspesaun Fiskalizasaun Atividade Ekonómika Sanitária no Alimentár (AIFAESA, sigla portugés), atribui sertifikadu apresiasaun ba jornalista na’in-15, ne’ebé loro-loron hala’o kobertura ba AIFAESA nia atividade inspesaun no fiskalizasaun iha terrenu.
Jornalista hirak ne’e mai husi mídia nasionál sira mak hanesan Agência Tatoli (TAOLI, I.P), Grupu Mídia Nasionál (GMN), Rádiu Televizaun Timor Lorosa’e (RTTL, E.P), Jornál Independente, Timor Post no Suara Timor Lorosa’e.
Inspetora Jerál Autoridade Inspesaun Fiskalizasaun no Atividade Ekonómika Sanitária Alimentár, Odete Viegas, hateten objetivu atribuisaun sertifikadu ba jornalista sira tanba mídia nia papél hanesan mós liman-ain no mídia nia papél importante iha AIFAESA nia servisu ne’ebé iha ligasaun ho públiku.
“Entaun, ami tau hamutuk hanoin katak ita-boot sira mós merese atu hetan rekoñesementu ruma husi instituisaun ida-ne’e. Ami labele selu ita-boot sira-nia servisu maibé ami bele atribui de’it sertifikadu neʼebé sai hanesan dokumentu referénsia,” Inspetora Jerál ne’e informa ba jornalista sira iha edifisiu AIFAESA, Matadoru, ohin.
Reprezentante jornalista husi Timor Post, Amelia Soares Babo, sente kontente tebes tanba AIFAESA bele konsidera ona papél mídia nian ne’ebé durante ne’e sempre fahe informasaun kona-ba servisu AIFAESA nian ba públiku.
“Entaun, ida ne’e sai hanesan parséria servisu nian tanba públiku mós presiza informasaun importante sira-ne’ebé durante ne’e AIFAESA halo inspesaun no fiskalizasaun ba operadór ekonómiku sira iha territóriu nasionál,” nia dehan.
Jornalista : Alexandra da Costa
Editór : Cancio Ximenes
