SEAK prevee rihun $15 selebra loron nasionál kultura iha Likisa
DILI, 14 Outobru 2025 (TATOLI)—Sekretária Estadu Arte no Kultura (SEAK) prevee orsamentu hamutuk rihun $15 atu selebra loron nasionál kultura ba da-11 iha munisípiu Likisa, ho objetivu atu promove identidade kulturál iha Timor-Leste.
Notísia Relevante: Governu iha kompromisu valoriza ‘Loron Nasionál Kultura’ Timor-Leste
Diretór Nasionál Promosaun Arte no Kultura iha Sekretária Estadu Arte no Kultura, Felix Ximenes, hateten ohin selebra loron nasionál kultura tanba ne’e hanesan loron ne’ebé importante tebes, nune’e sira sei konvida pratikante kultura sira iha postu-adminisrativu sira-ne’ebé pertense ba munusípiu Likisa.
“Ita sei konvida hotu sira, atu manifesta ita-nia loron nasionál kultura ida-ne’e, atu nafatin reafirma ita-nia identidade kulturál sai hanesan identidade nasionál,” Diretór ne’e informa ba jornalista sira liuhusi konferénsia imprensa ne’ebé realiza iha edifísiu SEAK, Pantai Kelapa, ohin.
Kona-ba preparasaun, nia dehan, husi parte SEAK halo ona koordenasaun ho Autoridade munisipiu Likisa, nune’e iha preparasaun ne’e SEAK sei mobiliza lia-na’in sira husi postu-administrativu sira-ne’ebé pertense ba munisípiu Likisa.
Programa ne’ebé SEAK sei halo iha atividade ne’e mak hanesan karavana kulturál, feira no mós semináriu nasionál.
Iha fatin hanesan, Diretór Jerál iha Sekretária Estadu Arte no Kultura, Gil Paulino dos Santos Oliveira, hato’o parabéns ba pratikante kultura sira hotu ne’ebé eziste iha Timor-Leste.
“Tanba ne’e mai ita kontinua hametin no haburas ita-nia eransa kulturál ne’ebé husi ita-nia bei’ala sira husik hela to’o ohin loron. Liuhusi kultura, ita reforsa liután ita-nia unidade iha família, komunidade, iha nivél lokál, munisípiu no iha nivel nasionál,” nia hateten.
Nia mós afirma, ba komemorasaun loron naisonál kultura, tuir lolos realiza ohin maibé iha ajustamentu kalendáriu, nune’e sei muda ba loron 24 fulan-Outubru semana oin mai.
Entretantu sekuénsia programa ba selebarasaun loron nasionál kultura mak hanesan atividade artístiku, feira kultura artezennatu lokál no semináriu nasionál ne’ebé sei diskute kona-ba kultura identidade no dezenvolvimentu nasionál.
Jornalista : Alexandra da Costa
Editór : Cancio Ximenes
