SEFOPE-Empregadór Nova Zelándia halo enkontru preparasaun rekrutamentu ba kandidatu traballadór timoroan
DILI, 20 Outobru 2025 (TATOLI)—Sekretária Estadu Formasaun Profisionál no Empregu (SEFOPE) hala’o enkontru ho delagasaun empregadór ne’ebé akompañia husi embaixadora Nova Zelándia ba Timor-Leste, hodi observa kondisaun ortikultura no preparasaun ba rekrutamentu kandidatu traballadór timoroan ba servisu iha Nova Zelándia.
Notísia Relevante: SEFOPE hahú anúnsiu vaga online ba joven sira servisu iha Nova Zelandia
Diretór Jerál Sekretária Estadu Formasaun Profisionál no Empregu, Carlito Rosário Cabral, hateten ohin SEFOPE simu delegasaun husi Nova Zelándia kompostu husi empregadór akompania husi Embaixadora Nova Zelándia ba Timor-Leste.
“Ida ne’e vizita dahuluk hodi haree kona-ba ita-nia kondisaun no preparasaun ba rekrutamentu kandidatu sira, tanba ne’e aira hakarak mai haree diretamente ita-nia servisu fatin no kondisaun agrikultura no ortikultura nian,” Diretór Jerál ne’e informa ba jornalista sira iha edifísiu Kaikoli, ohin.
Mia hatutan, durante delegasaun sira iha Timor sei fó biban ba sira hodi halo vizita ba fatin ortikultura balun iha Aileu, Ainaru, prosesu produsaun kafé iha Railaku, vizita sentru formasaun sira iha Dili laran.
“Sira mai halo vizita de’it karik vizita hotu mak sira sei ko’alia kooperasaun saida mak sira sei halo iha futuru mai,” nia dehan.
Embaixadora Nova Zelándia iha Timor-Leste, Helen Tunnah, hateten vizita ida-ne’e mai iha momentu importante ida hodi fo oportunidade ba Nova Zelándia no Timor-Leste kontinua servisu hamutuk ba implementasaun programa mobilidade traballadór ida-ne’ebé sei ajuda fó kontribuisaun ba Timor-Leste nia ekonómia no povu.
“Objetivu husi vizita ida-ne’e atu ita-nia ekipa husi Nova Zelándia bele aprende kona-ba Timor-Leste nia kultura no ninia povu, entaun sira sei ba vizita iha área ortikuktura no sei hasoru malu ho ofisiál importante sira husi Timor-Leste,” nia mdehan.
Nia dehan, ida-ne’e hanesan pasu tuir mai iha implementasaun ba sira-nia programa foun no iha tempu tuir mai bele lori traballadór timoroan sira ba servisu iha Nova Zelándia.
Jornalista : Alexandr da Costa
Editór : Cancio Ximenes
