DILI, 22 Outubru 2025 (TATOLI)—Portavós no reprezentante Família Ira Ara, Lautein, Luciano Romano Timor Maubere no Octavio da Conceição, konsidera autór livru Sérgio Dias Quintas ne’ebé hakerek istória kona-ba trajédia Maupitene ne’e, falsifika no manipula instória nomós dadus líder rezisténsia sira-nian la tuir realidade ne’ebé akontese iha aldeia Ira Ara iha tempu pasadu.
Notísia relevante: Eskritór Sérgio Quintas halo plájiu no distorsaun istória
Portavós Família Ira Ara, Luciano Romano Timor Maubere, hateten livru “RAJA VERRÍSSIMO DIAS QUINTAS Saya Mati Untuk Kemerdekaan” ne’e la’ós sai polémika maibé kria konfuzaun no halo manobra istória (pembelokan sejarah) no ho situasaun ida-ne’e mak obriga família Ira Ara atu hatene loloos kona-ba konteúdu livru ne’e rasik.
“Hanesan iha pájina 48 ne’ebé ninia konteúdu istória liga ho maluk rezisténsia balun husi aldeia Ira Ara, bainhira ha’u lee livru ne’e liuliu iha pájina 47 to’o 48, halo ha’u tanis tanba istória ne’ebé hakerek iha livru laran la sai realidade ka nakonu ho manipulasaun ne’ebé falsifikadu,” Portavós Luciano Romano Timor Maubere informa ba jornalista sira iha konferénsia imprensa ne’ebé hala’o iha Glorya Jeans, Kolmera, ohin.
Nia dehan, kuaze istória barak ne’ebé autór hakerek iha ninia livru ne’e lahanesan ho realidade maibé nakonu ho opiniaun pesoál, informasaun seluk mós kona-ba falsifikasaun ba pozisaun ema nian ne’ebé iha tempu pasadu hanesan ativista maibé iha autór nia livru hateten fali nu’udar asistente polítika, ne’e lalos ka fabrikadu.
“Ami halo leitura no analiza profunda hodi halo konsutasaun ba livru istória rezisténsia seluk kona-ba líder rezisténsia sira no orgaun partidu nian, inklui veteranus balun maibé iha livru la mensiona kona-ba istória aldeia Ira Ara nian ne’ebe autór livru hakerek,” nia dehan.
Notísia Relevante: Ramos-Horta sei konfirma istória iha livru ne’ebé Sérgio Quintas hakerek
Nia konsidera, ida-ne’e akuza Ira Ara-oan sira tanba ne’e públiku presiza hatene katak autór livru la’ós falsifika de’it livru maibé manipula dadus luta-na’in ka veteranu nian hodi hetan dedikasaun ba tinan 15 to’o tinan 19.
“Dadus sira-ne’e ami na’in-rua lee no konsultasaun ho ho lider rezisténsia sira afirma katak istória ne’e inventa no manipuladu, tanba faktu barak ne’ebé sai prova reál iha istória rezisténsia nian,” nia relata.
Tamba ne’e, sira mós sei hakat ba komandu PNTL hodi loke investigasaun ba membru polísia ne’ebé halimar ho raan maubere ninian, liuliu autór livru ninia maun Abrão Filipe Dias Quintas ne’ebé sasin falsu ba nia alin hodi hetan tinan 15 ba to’o 19.
Aleinde ne’e, nia lamenta, la’ós fó sasin de’it ba nia alin maibé nia mós fó sasin ba ninia dokumentu rasik hodi bele hetan tinan ualu (8) to’o 14.
Tanba, nai dehan, eskritór livru ho ninia família sira-ne’e mai rende ba inimigu sira (Indonézia) nia liman, no momentu ne’e ami reziste iha ai-laran oinsá mak sira mai halo fali atividade partidu FRETILIN iha vila laran.
“Nune’e, tenke hadi’a livru ne’e no rekoñese ninia-an katak sala. Tanba, ami ami la aseita ho konteúdu istória iha livru laran ne’ebé nakonu ho falsifikasaun,” nia lamenta.
Nia haktuir, antes ne’e sira halo ona diálogu koordenasaun ho autor livru, maibé sira lakohi rekoñese sira-nia sala no hakarak rezolve tuir dalan legál, tanba ne’e mak sira sei esforsu hodi hasoru mós parte Ministériu ba Asuntu Kombatente Libertasaun Nasionál (MACLN) hodi identifika faktu konkreta sira kona-ba autór ho ninia família.
Notísia Relevante: Sergio Quintas rejeita halo plájiu ba konteúdu istória kona-ba Masakre Muapitine
Jornalista : Alexandra da Coste
Editór : Cancio Ximenes
