TATOLI labele rekruta jornalista destakadu iha munisípiu tanba redusaun saláriu vensimentu
DILI, 27 Outubru 2025 (TATOLI)—Sekretáriu Estadu Komunikasaun Sosiál, Expedito Dias Ximenes, informa kanál ofisiál TATOLI, I.P enfrenta hela obstákulu hanesan fasilidade no rekursu umanu, tanba ne’e TATOLI mós halo ona audiénsia públiku ho Parlamentu Nasionál (PN) hodi hato’o ezekusaun Orsamentu Jerál Estadu (OJE) 2025 no proposta orsamentu ba 2026 ho alokasaun limitadu ba tinan oin.
Notísia Relevante: TATOLI, I.P propoin adisionál $400.294 iha OJE 2026
Nia hatutan, TATOLI labele halo rekrutamentu ba jornalista na’in-hitu (7) hodi destaka ba munisípiu hitu (7), tanba orsamentu ne’ebé prevee ba saláriu vensimentu iha OJE 2026 ne’e hetan redusaun.
“Iha prosesu audiénsia públiku ne’e Agência Tatoli mós hato’o sira-nia preokupasaun kona-ba fasilidade no rekrutamentu ba jornalista na’in-hitu hodi destaka ba munisípiu hitu iha Timor-leste, tanba redusaun saláriu vensimentu. Enkuantu iha kapitál menór iha orsamentu entaun sei sosa tan karreta mini bus (van) ida inklui komputadór hodi fasilita servisu jornalista nian,” Sekretáriu Estadu Komunikasaun Sosiál, Expedito Loro Dias Ximenes, hateten ba Agência Tatoli iha nia kna’ar fatin, sesta (24 Outubru 2025).
Entretanttu, nia dehan, Sekretária Estadu Komunikasaun Sosiál (SEKOMS) kontinua tau atensaun ba kanál ofisiál Estadu Ajénsia Notisioza Tatoli (TATOLI, I.P) no Rádiu Televizaun Timor Lorosa’e (RTTL, E.P) inklui mídia privadu sira hodi garante kualidade informasaun ba públiku.
“Governu da-sia (IX) nian iha área komunikasaun ne’e klaru hodi fó atensaun ba dezenvolvimentu kanál ofisiál Estadu nian hanesan Ajénsia Notisioza Tatoli (TATOLI, I.P) no Rádiu Televizaun Timor-Lorosa’e (RTTL, E.P) no mídia seluk tan hodi dezenvolve funsionamentu di’ak,” nia dehan.
Konserteza, nia hatutan, ida-idak ninia prezidente mak jere rasik ba órgaun mídia komunikasaun rua ne’e rasik no Governu sempre investe osan ba orgaun ofisiál Estadu rua ne’e kada tinan ho objetivu atu hato’o informasaun kona-ba asaun governativa no Estadu nian.
Dirijente órgaun komunikasaun ne’e dehan, orsamentu ne’ebé Governu investe ba aleinde ba atividade kobertura maibé presiza mós fó formasaun ba jornalista sira, fó bein estar ba jornalista sira atu fortifika liután kualidade informasaun.
Enkuantu, kualidade informasaun ne’e haree husi notísia ne’ebé publika la hamosu duvida ba públiku, katak konteúdu notísia prienxe tuir kritéria 5W+1H, no notísia ne’e atualidade.
“Satán hanesan RTTL nian ne’ebé uza satélite no Ajénsia Tatoli uza barak liu ho estreaming,” nia hateten.
Aleinde ne’e, nia hatutan, Governu la’ós de’it atu investe iha orgaun ofisiál Estadu rua ne’e maibé promove mós ba mídia konvensionál no plataforma dijitál privadu sira seluk atu nafatin iha inisiativa ba disiminasaun informasaun ne’ebé di’ak ba komunidade (audiénsia) sira.
Jornalista : Alexandra da Costa
Editór : Cancio Ximenes
