OEKUSI, 13 Novembru 2025 (TATOLI) – Diresaun Rejionál Terra no Propriedade (DRTP) Rejiaun Administrativa Espesiál Oekusi Ambeno (RAEOA), finaliza ona prosesu levantamentu parsela estatutu rai iha postu Unidade Patrollamentu Fronteira (UPF) 18 iha Rejiaun Administrativa Espesiál Oekusi Ambeno (RAEOA) hodi prepara atribui sertifikadu títulu rai.
Notísia relevante:SETP hahú levantamentu kadastrál ba abitante 200 iha Oekusi
Celestinho Casenube, nu’udar xefe ekipa ba levantamentu husi DRTP Oekusi, informa, pedidu levantamentu ne’e propoin husi komandu UPF, ba Autoridade RAEOA hodi halo levantamentu kadastrál ba postu UPF 18 inklui kazerna ida, nune’e bele sai na’in ba fatin ne’ebé membru UPF dezinada ba.
“Parsela ne’ebé UPF utiliza ona iha postu, tuir levantamentu kadastrál laiha disputa ruma ka problema kona-ba rai, tanba iha prosesu levantamentu ne’e mós hetan apoia no akompaña direita husi autoridade lokál sira, hanesan xefe suku, xefe aldeia no lia-na’in no komunidade sira apoia tebes, atu seguransa sira bele hela hakmatek hodi hala’o patrulla iha liña fronteira sira,” nia hateten iha postu UPF Sakato suku Nípani, ohin.
Nia informa, prosesu kontinuasaun ba futuru, dokumentu levantamentu sira-ne’e, Diresaun Rejionál Terra no Propriedade sei submete ba nasionál, hodi prepara ba atribuisaun sertifikadu títulu rai ba postu UPF ida-idak iha liña fronteira.
Notísia relevante:MI reabilita postu UPF 41
Komandante UPF Superentendente Xefe Polísia, Euclides Belo, agradese ba ekipa tékniku sira-nia esforsu hodi halo levantamentu hahú husi área urbana to’o fatin izoladu sira, konsege finaliza ho susesu.
“Nu’udar komandante, ha’u sente orgullu tanba kooperasaun serbisu ne’ebé terra propriedade halo, ne’e la’os fasil tanba iha Oekusi postu UPF barak mak dook husi vila, sira tenke la’o ain, esforsa maka’as no koordena ho autoridade lokál sira, tan ne’e mak ha’u nu’udar komandante apresia ba estrutura RAEOA nian, espesialmente ba autoridade lokál no komunidade sira tanba oferese postu hirak-ne’e ba PNTL, nune’e ita-nia UPF sira utiliza, katak rai ne’e propriedade instituisaun Estadu nian, hodi garante seguransa iha liña fronteira,” nia orgullu.
Tanba ne’e, dokumentu levantamentu hirak-ne’e, bainhira prosesa no iha rezultadu ba atribuisaun títulu rai, komando UPF sei kanaliza ba Ministériu Interiór (MI) nu’udar tuteladu ba asuntu seguransa nian hodi konsidera, nune’e labele iha tan espasu seluk atu buka tan rai bainhira, Governu halo konstrusaun ka reabilitasaun ba postu UPF sira.
Notísia relevante:Autoridade RAEOA preokupa empreza abandona projetu konstrusaun postu UPF iha Citrana
Jornalista: Abílio Elo Nini
Editór: Rafael Ximenes de A. Belo
