OEKUSI, 17 Abríl 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), lideradu Rogério Tiago Lobato, planu koordena ho Ministériu Interiór kona-ba projetu postu integradu ba Polísia Unidade Patrollamentu Fronteira (UPF) iha Citrana, suku Bene-Ufe, sub-rejiaun Nítibe, tanba daudaun projetu konstrusaun abandonadu hela.
PA RAEOA hala’o vizita ofisiál ba konstrusaun postu referidu, ne’ebé lokaliza iha aldeia Manán suku Bene-Ufe, abanadonadu kuaze tinan haat ona, dezde 2021 to’o agora laiha kontinuasaun.
Notísia relevante:Komunidade Bene-Ufe husu hapara konstrusaun UPF Citrana
Projetu konstrusaun postu integradu UPF Citrana, implementa husi empreza Aprília Unipesoál Lda, ho valór kontratu $340,903.03 ho númeru kontratu, NCB/087/MI-2021, durasaun servisu hahú iha loron 15 Dezembru 2021, tuir planu tenke konklui iha loron 15 Agostu 2022.
Ho situasaun ne’e, Autoridade RAEOA ne’e promete sei koordena ho Ministériu Interiór, nune’e bele kontinua tanba gasta ona osan Estadu ba obra ne’e.
“Ne’e asuntu Ministériu Interiór nian, maibé halo iha Oekusi entaun administrasaun RAEOA mós iha interese ba fatin UPF sira tenke hadi’a, ne’ebé ha’u sei ko’alia ho sira, oinsa ita bele koopera malu atu hadia tanba obra ne’e gasta osan barak. Nune’e ita labele gasta depois so’e tiha lakohi kontinua, ita tenke kompleta fatin ne’e, atu ita-nia seguransa sira hela ho dignu, iha tempu badak, ha’u sei ko’alia ho Ministériu Interiór, ami konvida sira atu kontinua obra ne’e,” nia informa ba jornalista sira iha Citrana, kuarta ne’e.
Biban ne’e, Nia observa mós kondisaun liuliu toba fatin ba membru UPF sira mós ladun dignu tanba ne’e nia rekomenda ba Govenru Sentrál atu haree asuntu ne’e.
“Enkuantu buka atu kontinua obra ne’e, ita tenki hala daudaun ona konstrusaun ruma, atu ita-nia polísia sira labele toba de’it iha uma tali tahan, ne’ebé la dignidade ba polísia sira servisu ba Estadu Timor-Leste, fatin toba de’it susar, ha’u uluk militár, fatin toba ne’e tenki di’ak tanba ita toba ho arma nasaun nian, kilat sira, ne’ebé tenki iha fatin dignu,” nia hateten.
Maibé tuir observasaun husi Jornalista Ajénsia Tatoli,I.P, katak obra ne’e dadaun abandona hela, duut mak nakonu no laiha seguransa atu hamoos ka hein konstrusaun ne’e.
Notísia relevante:Hadia infraestrutura PNTL prioritáriu hosi Ministériu Interiór iha tinan ne’e
Jornalista: Abílio Elo Nini
Editór: Florencio Miranda Ximenes
