DILI, 13 Novembru 2025 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2026 husi Primeiru-Ministru iha faze espesialidade ho votu afavór 41. kontra 0 no abstensuan 23.
Notísia Relevante: PN aprova proposta OJE 2026 iha jeneralidade
Husi proposta Orsamentu Jerál Estadu (OJE) 2026 ho montante $3.697.532 kompostu ba programa funsionamentu ba dezenvolvimentu institusionál fahe ba kategória saláriu vensimentu $1.160.478, bens servisu $2.275.878, transferénsia públika $0, kapitál menor ho montante $50.000 no kapitál dezenvolvimentu $0 ho totál $3.486.356.
Programa estratéjia polítika Governu no polítika nasionál fahe ba kategória saláriu invensimentu $0, bens servisu $211.176, transferénsia públika $0, kapitál menór $0 no kapitál dezenvolvimentu $0 ho totál $211.176.
Husi totál orsamentu ne’e kompostu husi programa rua no atividade tolu hanesan funsionamentu ba dezenvolvimentu institusionál iha sub-programa rua no atividade tolu.
Iha programa daruak nian kona-ba estratéjia polítika Governu no polítika nasionál, kompostu ba sub-programa haat, delimitasaun fronteira terrestre no marítima, planeamentu estratéjiku ba dezenvolvimentu, lidera no koordena dezenvolvimentu projetu tasi-mane, ekonómia azúl ho ninia atividade lima.
Aleinde ne’e, Parlamentu Nasionál mós aprova proposta nú. 21 hodi aumenta ba saláriu vensimentu Primeiru-Ministru nian ho montante rihun $62, nune’e orsamentu ne’ebé PN aprova kompostu husi proposta inisiál no proposta proponente hamutuk $3.759.532.
Durante diskusaun parte opozisaun aprezenta tolu husu redusaun orsamentu maibé hakat ba votasaun la pasa.
PN aprova proposta adisionál rihun $62 ba Primeiru-Ministru
Aleinde ne’e, Parlamentu Nasionál aprova proposta adisionál (aumenta) rihun $62 ba Primeiru-Ministru iha Orsamentu Jerál Estadu (OJE) 2026 iha diskusaun faze espesialidade ho votu afavór 42, kontra 0 abstensaun 22.
Deputadu CNRT, PD, KHUNTO, propoin hasai rihun $62 husi títulu Dotasaun Jerál Estadu iha Programa Inkluzaun Sosiál hodi realoka fali ba Primeiru-Ministru iha Programa Funsionamentu no Dezenvolvimentu Instituisionál.
Ho justifikasaun adisionál ne’e hodi halo pagamentu saláriu Primeiru-Ministru ne’ebé la orsamenta, tanba titulár kargu opta simu husi ninia pensaun eis-titulár órgaun soberania, ne’ebé extinta (halakon) iha fulan-Setembru nia rohan.
“Ami-,nia proposta ne’e identifika iha nesesidade duni iha audiénsia, tanba lei pensaun vitalísia aprovadu, uluk Primeiru-Ministru simu de’it husi pensaun vitalísia,” Deputadu CNRT, Patrocínio dos Reis Fernandes, fundamenta.
Deputadu ne’e dehan, tamba Primeiru-Ministru ninia saláriu vensimentu la tama iha previzaun OJE 2026 ba Gabinete Primeiru-Ministru, tanba nu’udar konsekuénsia ida husi revogasaun pensaun vitalísia.
Aleinde ne’e, tinan hirak ba kotuk GPM mós la prevee saláriu ba xefe Governu tanba PM durante ne’e simu husi eis titulár.
“Ho nune’e, ami deside halo fali proposta hodi prevee saláriu vensimentu ba Primeiru-Ministru,” nia dehan.
Jornalista : Alexandra da Costa
Editór : Cancio Freitas
