DILI, 24 Novembru 2025 (TATOLI)—Ministru Transporte Komunikasaun (MTK), Miguel Gonçalves Manetelu, hateten MTK seidauk hetan rekoñesementu no seidauk halo despaixu ba karta pedidu espansaun voo Aviaun Wings husi aeroportu El Tari Kupang mai Timor-Leste tanba seidauk prienxe kritéria Organizasaun Internasionál Aviasaun Sivíl (ICAO, sigla inglés).
“Iha semana ida liubá ha’u mós haree informasaun iha facebook no ha’u lahatene maluk ida naran Fernando Alves ne’e sidadaun timor ka, se lae timoroan ne’ebé agora daudaun hela iha Kupang,” Ministru Manetelu informa ba jornalistasira iha nia knaar fatin, ohin.
Nia laiha informasaun maske sira foin hakerek karta ida ba nia iha loron 11 fulan-Novembru foin lalais ne’e no iha informasaun sira mensiona dehan tempu badak aviaun sei semo maibé nia lahatene sé mak fó autorizasaun ba sira.
“Ha’u hateten bainhira aviaun ida atu espanda nia voo presiza hetan autorizasaun no prosesu ne’e la’ós badak, tanba aviaun ne’e atu semo husi nasaun ida ba nasaun seluk,” nia dehan.
Timor-Leste hanesan nasaun Estadu la’ós ona provínsia ne’ebé ninia relasaun ne’e di’ak tebes, ne’e lae, tanba iha nu’udar nasaun iha mós regra husi ICAO nian no entidade ne’ebé atu sertifika prosesu hotu, avalia dokumentu no ikus mai atu fó autorizasaun ne’e mak Autoridade Aviasaun Sivíl Timor-Leste (AACTL).
“Ho nune’e, ha’u rasik mós seidauk fó despaixu karta ne’e tanba la’ós pesoál ida reprezentante ne’e mak hakerek maibé operadór aviaun ne’e mós tenke hakerek karta ida mai, no seidauk deteta loloos sé mak na’in ba aviaun. Ita tama ona ba ASEAN no ne’e la’ós bandu maibé tenke la’o tuir prosedimentu ne’ebé iha,” nia hateten.
Jornalista : Alexandra da Costa
Editór : Cancio Ximenes
