MS haruka ai-moruk item lima ba teste kualidade iha laboratóriu Austrália
DILI, 26 Novembru 2025 (TATOLI)—Diretór Nasionál Farmásia Produtu Médiku (DNFPM), Delfim Ferreira, hateten Ministériu Saúde haruka ona ai-moruk item lima (5) ba teste kualidade iha Laboratóriu Therapeutic Goods Administration Australia.
“Iha tinan 2025 ita konklui ona, tanba iha fulan-Outubru ita haruka tan item lima ba Laboratóriu Therapeutic Goods Administration Austrália no ita sei hein nia rezultadu iha fulan-Dezembru,” Delfim Fereira, hateten iha Hotel Novu Turizmu, ohin.
Ai-moruk item lima ne’ebé haruka ba Laboratóriu Therapeutic Goods Administration Austrália mak hanesan (1) Flamex ibuprofen suspension BP 100 mg/5ml, (2) Ciproshar 500 ciprofloxacin tablets USP 500 mg, (3) Cloxaphar 500 Cloxacilin sodium Capsules USP, (4) Generics Plus Chloramphenicol Sodium Succinate for Injection BP1 gm no (5) Nifedipine Extented Release tablets 10 mg.
“Item lima ne’e rasik ita foti barak iha Institutu Nasionál Farmásia Produtu Medikamentu (INFPM) no klinika privadu sira iha Dili,” nia dehan.
Nia haktuir, ba tinan oin, Ministériu Saúde ho Laboratóriu Therapeutic Goods Administration Austrália nia extensaun ramata ona, maibé sei hein Ministériu Saúde aprova tan mak DNFPM sei halo akordu kontinuasaun ho Laboratóriu Austrália, nune’e haruka nafatin ai-moruk sira ba halo teste.
Jornalista : Felicidade Ximenes
Editór : Cancio Ximenes
